Një video e dhunshme dhe tronditëse është shpërndarë gjerësisht në rrjetet sociale, duke treguar dhunën barbare të ushtruar nga disa vajza të mitura ndaj një 14-vjeçareje. Pamjet, të cilat janë filmuar në një ambient të mbyllur në Gjilan, kanë shkaktuar një valë zemërimi dhe shqetësimi në mbarë Kosovën.
Në video, viktima dëgjohet duke iu lutur dhunuesve të saj, duke thënë “mos ma leni trupin këtu nëse më bjen të fikët”. Përgjigja e vajzave të tjera është akoma më tronditëse, pasi ato e kërcënojnë hapur me vrasje duke i thënë: “jo bre, nuk ta lëmë trupin këtu, ta hupim…ta djegim trupin. A e di që unë e di qysh hupet një trup, veç ta çelim një gropë”.
Arrestime dhe hetime në vazhdim
Menjëherë pas denoncimit të rastit dhe shpërndarjes së videos, autoritetet policore në Kosovë kanë nisur hetimet. Njëra nga të dyshuarat, e moshës 14 vjeç, është arrestuar dhe është dërguar në mbajtje për 24 orë. Për shkak se vajzat e tjera janë nën moshën 14 vjeç, çështja po trajtohet me kujdes të veçantë nga Prokuroria në koordinim me Qendrën për Punë Sociale. Rasti është iniciuar fillimisht si lëndim i lehtë trupor, por rrethanat dhe kërcënimet e regjistruara në video sugjerojnë një ngjarje më të rëndë. Ky incident vë në pah një problem serioz me dhunën mes të rinjve, duke ngritur pyetje për rolin e institucioneve dhe familjes.