Kombëtarja shqiptare e futbollit ka nisur me përkushtim përgatitjet për ndeshjen e radhës në kualifikueset e Botërorit 2026, duke lënë pas krahëve barazimin pa gola në sfidën e shumëpritur ndaj Serbisë. Kuqezinjtë tashmë kanë hedhur sytë drejt takimit të rëndësishëm në transfertë kundër Letonisë, që do të zhvillohet këtë të martë në qytetin e Rigës.
Pas përfundimit të sfidës së fundit, skuadra e drejtuar nga trajneri Silvinho ka pasur vetëm pak ditë në dispozicion për të rikuperuar energjitë dhe për t’u përgatitur taktikisht për përballjen e radhës. Sot pasdite, kuqezinjtë janë nisur me një çarter të posaçëm nga Rinasi drejt Letonisë, ku tashmë kanë mbërritur për të vijuar përgatitjet finale në prag të ndeshjes.
Skuadra është udhëtuar në grup të plotë, me përjashtim të një mungese të rëndësishme: kapiteni Berat Gjimshiti nuk do të jetë i gatshëm për sfidën ndaj Letonisë, pasi ka plotësuar numrin e kartonëve të verdhë në këtë fushatë kualifikimesh. Një mungesë që do të detyrojë stafin teknik të rikonceptojë repartin e mbrojtjes për këtë ndeshje vendimtare.
Megjithatë, ajo që ka tërhequr vëmendjen e veçantë në grumbullim është gjendja shpirtërore e sulmuesit Rey Manaj. Ky i fundit ishte protagonist i një momenti të vështirë në përballjen me Serbinë, kur humbi një penallti decizive, që mund t’i kishte dhënë Shqipërisë një fitore historike. Pas ndeshjes, Manaj kishte shprehur haptazi zhgënjimin dhe trishtimin për këtë episod.
Por, duket se sulmuesi kuqezi ka ditur ta përpunojë shpejt këtë moment, dhe vetëm një ditë më vonë, ai është shfaqur i qeshur dhe i motivuar në radhët e skuadrës. Në një video të shpërndarë nga FSHF në rrjetet sociale, Manaj shihet duke buzëqeshur dhe duke u stërvitur me entuziazëm krah shokëve të ekipit — një sinjal pozitiv për rikthimin e besimit dhe përgatitjen për ndeshjen ndaj Letonisë.
Ky reagim i Manajt është përshëndetur edhe nga tifozët kuqezi, të cilët i kanë ofruar mbështetje të madhe pas penalltisë së humbur, duke theksuar se një episod i tillë nuk duhet të errësojë kontributin e tij për Kombëtaren.
Në kampin kuqezi, atmosfera duket pozitive. Trajneri Silvinho dhe stafi i tij janë të përqendruar në mënyrën më të mirë për të ndërtuar formacionin për duelin ndaj Letonisë, një kundërshtar që nuk duhet nënvlerësuar, sidomos në fushën e vet.
Shqipëria ka një mundësi të artë për të marrë pikë të plota në këtë sfidë, që do ta afronte më shumë me objektivin historik të kualifikimit në Botëror.
Sfida ndaj Letonisë do të zhvillohet këtë të martë, me fillim nga ora 20:45, dhe pritet me shumë interes nga tifozët shqiptarë anembanë botës.