Një ngjarje e rëndë ka ndodhur mbrëmjen e së shtunës në qytetin e Durrësit, ku një 31-vjeçar ka mbetur i plagosur rëndë me thikë. Ngjarja ka ndodhur rreth orës 21:00, në lagjen nr. 12, dhe dyshohet se konflikti ka lindur për motive të dobëta.
Sipas të dhënave paraprake nga vendi i ngjarjes, viktima e plagosur, shtetasi E. G., ndodhej në një lokal në gjendje të dehur, kur është nxjerrë jashtë nga pronarja e ambientit. Pasi ka dalë në rrugë, një person i paidentifikuar, që dyshohet se ka ardhur nga ana tjetër e rrugës, e ka goditur me mjet prerës – një thikë – duke i shkaktuar plagë serioze.
I plagosuri është transportuar me urgjencë në Spitalin Rajonal të Durrësit, ku ndodhet nën kujdesin e mjekëve dhe, sipas raportimeve të para, është jashtë rrezikut për jetën.
Autori i dyshuar i sulmit është identifikuar si shtetasi I. Ll. Ai është larguar me shpejtësi menjëherë pas ngjarjes dhe aktualisht ndodhet në kërkim nga policia. Shërbimet e rendit po zhvillojnë kontrolle intensive në zonë për kapjen e tij.
Grupi hetimor ndodhet në vendin e ngjarjes dhe po punon për të zbardhur në detaje dinamikën dhe shkaqet e incidentit, si dhe për të siguruar prova që mund të çojnë në arrestimin e autorit. Autoritetet njoftojnë se hetimet janë në vijim dhe do të ketë informacion shtesë në orët në vazhdim.