Një ngjarje tragjike e ndodhur më 6 gusht në Durrës, ku 65-vjeçarja Fatime Hasani humbi jetën pasi u hodh nga dritarja e tualetit, ka marrë një kthesë të rëndë. Vajza e të ndjerës, Mimoza Hasani, në një intervistë për TVA News, ka ngritur akuza të drejtpërdrejta ndaj babait të saj, Arif Hasani, duke e konsideruar atë përgjegjës për vdekjen e nënës.
Sipas Mimozës, nëna e saj shpeshherë ishte dhunuar fizikisht dhe psikologjikisht nga babai, duke bërë që vdekja e saj të mos jetë aksidentale. Ajo thekson se lajmin e ka marrë vesh nga komshinjtë, të cilët kanë dëshmuar se babai nuk kishte bërë asnjë përpjekje për të ndihmuar gruan e tij, ndërsa ajo dergjej në gjak poshtë pallatit.
Dyshime për mjekimin e gabuar dhe hetimet e vonuara
Mimoza ngre dyshime të forta edhe për mjekimin e nënës së saj. Ajo thotë se Fatime Hasani ishte detyruar të merrte ilaçe për çrregullime neurotike, të përshkruara pa kontroll nga psikiatrja Greta Guga. Këto ilaçe, sipas Mimozës, i kishin shkaktuar efekte anësore të rënda.
Përveç kësaj, vajza e të ndjerës kritikon ashpër edhe hetimet e policisë. Ajo akuzon inspektorin e zonës, Ermal Azizaj, se nuk ka marrë masa në kohën e duhur, duke theksuar se hetimi filloi me vonesë. Ajo shprehet se rrobat e gjetura me pika gjaku në tualet nuk ishin analizuar dhe kamerat e sigurisë u morën me vonesë.
Apeli për drejtësi dhe hetim të thelluar
Vëllai i Fatime Hasanit, gjithashtu i intervistuar nga TVA News, shprehet se dhëndri i tij i është dukur gjithmonë një njeri negativ dhe dyshon se ai ose e ka vrarë motrën e tij, ose e ka shtyrë drejt këtij akti tragjik. Familjarët kërkojnë që drejtësia të vihet në vend dhe të bëhet një hetim i thelluar për të zbardhur të vërtetën. Ata apelojnë që çdo provë të mblidhet dhe të analizohet, në mënyrë që shpirti i të ndjerës të prehet në paqe.