Brampton, Kanada – Një ngjarje tragjike dhe rrëqethëse ka tronditur komunitetin shqiptar dhe diasporën në Kanada, pasi Savanah Kulla, një 29-vjeçare me origjinë shqiptare dhe nënë e katër fëmijëve të vegjël, u vra brutalisht nga partneri i saj, Anthony Deschepper, në një parking në Brampton.
Savanah la pas katër fëmijë të mitur: Joseph (6), Mathew (5), Kalem (4) dhe Skyla-Rose (1 vjeçe), të cilët tashmë janë lënë pa kujdesin dhe dashurinë e nënës së tyre në moshë kaq të njomë.
Thirrje Për Mbështetje Për Katër Jetët E Vogla
Pas kësaj humbjeje të rëndë, shoqja e fëmijërisë së Savanah-s, Veronica, ka marrë iniciativën për të hapur një faqe në platformën “GoFundMe” me qëllim që të mbledhë fonde për kujdesin dhe edukimin e katër jetimëve.
Në mesazhin e publikuar në faqen e donacioneve, Veronica ndan dhimbjen e madhe të familjes:
“Zemrat e familjes sonë janë të thyera përtej fjalëve. Savannah ishte një shpirt i bukur, një nënë dhe mike e dashur, që jetonte vetëm për fëmijët e saj. Ata ishin drita e çdo dite të saj. Tani na takon ne të sigurojmë që ata të rriten me dashurinë dhe stabilitetin që ajo do t’u kishte dhënë.”
Fondet e mbledhura do të destinohen për të siguruar arsimin, terapinë dhe kujdesin afatgjatë të katër fëmijëve, duke u përpjekur t’u ofrohet një e ardhme sa më e qëndrueshme pavarësisht tragjedisë.
Në apelin e saj, Veronica kërkon solidaritetin e komunitetit: “Asnjë ndihmë nuk është e vogël. Edhe një ndarje e këtij apeli është një akt dashurie për fëmijët e Savannah-s.”
Kjo histori ka mobilizuar komunitetin shqiptar në diasporë, të cilët po bashkohen për të ndihmuar fëmijët e pafajshëm të viktimës së dhunës brutale.