Nesër rikthehet qarkullimi në aksin Librazhd-Prrenjas…
Pas 10 ditësh bllokadë totale, nga nesër në mesditë qytetarët mund të lëvizin lirshëm në aksin Librazhd–Prrenjas. Kru i Autoriteti Rrugor Shqiptar, Ami Kozeli, bën me dije se rruga alternative ka përfunduar dhe do të jetë e aksesueshme për udhëtarët nesër në orën 12:00.
“Rruga do të hapet duke filluar nga nesër në orën 12:00. Gjatë kësaj periudhe, me masat që u morën, pra me devijimin e rrjedhës së lumit që të mos godiste më poshtë hekurudhës dhe me lehtësimin e trupit të rrëshkitur na shërbeu shumë për të gjithë punën parapërgatitore që u bë gjatë këtyre ditëve për të hapur trafikun. Segmenti do të jetë i hapur për të gjitha mjetet, kemi 4 ditë që e mbajmë nën monitorim të vazhdueshëm, edhe me mjete të rënda”, njoftoi drejtori i ARRSH-së, Ami Kozeli.
Po sot, Autoriteti Rrugor Shqiptar ka publikuar një video ilustruese, ku tregohet grafikisht mënyra sesi rrëshqiti segmenti Librazhd–Prrenjas, te Arrat e Gurrës në Dragostunjë, ku mendohet se rrëshqitja nisi në anën e poshtme të rrugës.
Pas marrjes së kampionëve gjeologjikë përmes shpimit me sondë në katër pika kyçe, të cilët do t’i nënshtrohen ekspertizës për qëndrueshmërinë e zonës, ARRSH ka publikuar edhe gjurmën se ku do të ndërtohet aksi i ri me gjatësi 1.3 kilometra, që do të lidhë Dragostunjën me Hotolishtin.
Më 21 shkurt, ARRSH vendosi bllokimin total të aksit, pasi pati rrëshqitje masive dherash. Ura ku kalonte rruga e vjetër pësoi dëme të mëdha, ndërkohë që u dëmtua edhe gjurma e rrugës së re. Për pasojë, qarkullimi u devijua në akset Maliq–Lozhan–Moglicë–Gramsh dhe Korçë–Ersekë–Leskovik–Përmet–Këlcyrë–Tepelenë.
Pas ditësh të tëra pune, duket se tani do të hapet një rrugë provizore, ku do të bëhet kalimi i automjeteve. Vetë ARRSH pretendon se shkak i rrëshqitjeve ishte shiu, ndërkohë që prokuroria ka nisur hetimet. Ka dyshime se kompania që po ndërton rrugën e re ka gërryer lumin dhe, për pasojë, kjo ka sjellë rrëshqitje masive dherash.