Deputeti socialist në largim, Petro Koçi, ka shprehur publikisht për herë të parë rezerva në lidhje me stilin e komunikimit të disa prej deputetëve të rinj të Partisë Socialiste, të cilët u zgjodhën në zgjedhjet e 11 majit. Koçi i ka konsideruar disa prej sjelljeve të tyre, veçanërisht në rrjetet sociale, si të papërshtatshme për imazhin e partisë.
I ftuar në emisionin “Off the Record”, Petro Koçi u ndal në mënyrë të veçantë te rasti i Zegjine Çaushit, deputete e re e Qarkut të Fierit, e cila ka tërhequr vëmendjen e publikut dhe është bërë virale në rrjetet sociale për videot e saj thumbuese ndaj deputetit të Partisë Demokratike, Gazment Bardhi.
Sipas Koçit, sjellja e Zegjinesë në platformat online është e ekzagjeruar dhe nuk përkon me imazhin serioz që Partia Socialiste synon të projektojë. Ai u shpreh se PS është një parti me traditë dhe seriozitet.
Në mënyrë ironike, gazetari i emisionit ka përmendur disa emra të tjerë të deputetëve socialistë të njohur për stilin e tyre në publik apo në rrjetet sociale, si Elisa Spiropali, Edona Bilali, Bora Muzhaqi, Safet Gjici, Shukri Xhelili apo Tërmet Peçi, duke lënë të kuptohet se kriteri i “seriozitetit” mund të jetë subjektiv.
“Ajo ka bërë një gjë që është e ekzagjeruar dhe është një shpërdorim personaliteti në një përmasë që mendoj se nuk duhet të përsëritet më. Nuk është ky imazhi i PS-së. PS-ja është një parti serioze,” u shpreh Koçi, duke theksuar se mënyra se si përfaqësuesit publikë komunikojnë në rrjetet sociale nuk duhet të dëmtojë seriozitetin dhe imazhin e partisë si një ekip.
Koçi pranoi se rrjetet sociale kanë një rol të rëndësishëm në komunikimin politik, por sugjeroi që përfaqësuesit e PS-së duhet të gjejnë një mënyrë më të përmbajtur dhe profesionale për të komunikuar me publikun. “Nuk mendoj se kjo duhet të jetë linja e fushatës së PS-së. Sot vendos shumë rrjeti social, padyshim, por duhen bërë gjërat më ndryshe,” tha ai.
I pyetur nëse të rinjtë që dolën nga zgjedhjet e fundit janë e ardhmja e Partisë Socialiste, Petro Koçi u shpreh se kjo do të varet nga rruga që ata do të ndjekin në politikë dhe nga formimi politik që do të marrin. “Si brez janë e ardhmja, por si persona do të varet. Disa prej tyre do të jenë vërtet talente sepse edhe do të stërviten dhe kaliten,” përfundoi ai. Komentet e Petro Koçit hapin një debat të ri brenda Partisë Socialiste për stilin e komunikimit dhe imazhin publik të përfaqësuesve të saj, veçanërisht në epokën e rrjeteve sociale.