Ish-presidenti dhe kreu i Partisë së Lirisë, Ilir Meta, ka shpërthyer në akuza ndaj drejtësisë shqiptare pas vendimit të Gjykatës që la në fuqi masën e sigurisë “arrest me burg”, duke argumentuar se ai përbën rrezik për intimidimin e dëshmitarëve në proceset gjyqësore ku është i përfshirë.
Meta e ka cilësuar këtë vendim si “absurd” dhe “politikisht të motivuar”, duke theksuar se, sipas tij, nuk ka asnjë arsye që të mbahet i izoluar me këtë argument. “Unë nuk kam më asnjë anëtar partie me të cilin të lidhem për këtë çështje. Nuk kam kë të intimidoj. Ky është një absurditet i pastër,” – është shprehur Meta, duke nënkuptuar se vendimi i gjykatës nuk mbështetet në fakte reale, por në një strategji për ta mbajtur nën presion.
Beqiri: Vendimi i gjykatës është i drejtë – Meta ka treguar se nuk kursen askënd
Ndryshe nga pretendimet e Metës, avokati i njohur Idajet Beqiri, në një intervistë televizive, ka dhënë një deklaratë tronditëse duke mbështetur vendimin e gjykatës dhe duke hedhur akuza të rënda ndaj ish-presidentit.
Sipas Beqirit, rreziku që Meta të ndikojë tek dëshmitarët është real dhe i bazuar në precedentë të së shkuarës. “Vendimi i gjykatës është i qartë dhe i saktë. Meta ka treguar se nuk kursen askënd, sidomos kur është vetë në rrezik. Ka treguar që vret dëshmitarë,” – tha Beqiri.
Avokati solli në vëmendje një nga episodet më të përfolura të së kaluarës: çështjen e arkave të floririt në Krrabë, ku, sipas tij, dy dëshmitarë okularë të rinj “u zhdukën” në rrethana të dyshimta. “Më gjeni dy djemtë që ngritën arkat e floririt në Krrabë. Ata nuk jetojnë më. Ikën sepse e hëngrën kokën e verdhë nga Ilir Meta,” – deklaroi ai, duke e lidhur humbjen e tyre të jetës me porosi të dhëna nga Meta.
“Meta ka paguar vrasës”
Beqiri shtoi se Meta nuk vepron si individ i vetëm, por si një organizatë kriminale e strukturuar, e cila ka funksionuar për vite të tëra me pagesa ndaj grupeve kriminale për të kryer atentate.
“Meta ka paguar vrasës. Ka paguar edhe në raste të tjera. Nuk është se i bën vetë me dorën e tij, por i ka porositur. A e harruat se çfarë ndodhi me ‘lepurin’, kur u urdhërua ekzekutimi i tij? Këto janë çështje të hapura dhe nuk janë zbardhur asnjëherë sepse drejtësia jonë e kalbur nuk shkoi deri në fund,” – u shpreh Beqiri.
Avokati la të kuptohet se ka edhe dëshmi të tjera të cilat, nëse do të dilnin në pah, do të ekspozonin lidhje të drejtpërdrejta të Metës me ngjarje kriminale. Ai përmendi rastin e shumëpërfolur të Bamit, një personazh i botës së krimit, i cili sipas tij do të tregonte hapur se kush e kishte urdhëruar për atentatin ndaj vëllait të një deputeti të Lezhës. “Nëse Bami vjen në Shqipëri dhe dëshmon, atëherë e gjithë e vërteta del në dritë. Ai do tregojë se kush e ka urdhëruar,” – deklaroi Beqiri.
Një betejë ligjore që pritet të ashpërsohet
Deklaratat e Beqirit e thellojnë edhe më shumë polemikën e madhe që shoqëron arrestimin e Ilir Metës, i cili prej kohësh pretendon se po përndiqet politikisht nga mazhoranca e Edi Ramës. Nga ana tjetër, organet e drejtësisë theksojnë se ai përbën rrezik real për procesin hetimor, sidomos për dëshmitarët që mund të zbardhin ngjarje të rënda të së kaluarës.
Me akuzat e ndërsjella mes palëve, beteja ligjore dhe politike rreth Metës pritet të bëhet edhe më e nxehtë në javët e ardhshme. Përplasja nuk është më vetëm mbi masën e sigurisë, por mbi vetë figurën e tij politike, të akuzuar si “ish-president” dhe “udhëheqës partie”, por nga kritikët e tij, edhe si “simbol i pandëshkueshmërisë kriminale” në tranzicionin shqiptar.