Rajoni i veriut është tronditur nga dy ngjarje të dhimbshme të ndodhura me pak orë diferencë, të cilat kanë sjellë humbjen e jetës së dy qytetarëve në rrethana tragjike dhe ende të paqarta.
E para ka ndodhur më 6 maj në fshatin Manati të Lezhës, ku një grua 51-vjeçare, me inicialet D. B., ka humbur jetën në rrethana që ngjallin dyshime të forta për vetëhelmim. Sipas të dhënave paraprake, gruaja është paraqitur në gjendje të rëndë shëndetësore në Spitalin Rajonal të Lezhës, ndërsa më pas është dërguar me urgjencë në Qendrën Spitalore Universitare “Nënë Tereza” në Tiranë. Pavarësisht përpjekjeve të stafit mjekësor dhe ndërhyrjeve të menjëhershme, ajo nuk arriti të mbijetojë.
Dyshimet e para flasin për konsumim të fostoksinës, një lëndë helmuese që është përdorur më parë në disa raste të vetëhelmimeve fatale në Shqipëri. Policia ka nisur hetimet për të zbuluar motivet dhe rrethanat e sakta që e çuan gruan drejt këtij akti fatal. Burime pranë hetuesve bëjnë me dije se janë marrë dëshmi nga të afërm dhe persona të njohur të viktimës, për të kuptuar nëse ajo kishte shfaqur shqetësime psikologjike ose ndodhej në kushte të rënda sociale apo familjare. Materialet për këtë rast janë referuar në Prokurorinë e Lezhës për vijimin e hetimeve të mëtejshme.
Ndërkohë, një tjetër ngjarje tragjike është shënuar në orët e para të së njëjtës ditë, në fshatin Gëziq të Mirditës. Rreth orës 05:55 të mëngjesit, Salla Operative është njoftuar për praninë e një trupi të pajetë në rezervuarin e fshatit. Menjëherë janë angazhuar forcat e policisë lokale dhe njësia e polumbarëve të Repartit Special “RENEA”, të cilët pas kërkimeve arritën të nxjerrin trupin nga uji.
Viktima është identifikuar si N. N., 56 vjeç, banor i zonës. Nga të dhënat paraprake dhe deklaratat e familjarëve, mësohet se ai vuante prej kohësh nga probleme të shëndetit mendor. Këqyrja fillestare e trupit nuk ka zbuluar shenja dhune apo dëmtime të tjera fizike, duke forcuar dyshimet se bëhet fjalë për një rast të vetëmbytjes. Megjithatë, grupi hetimor po vijon punën për të sqaruar çdo aspekt të ngjarjes dhe për të përjashtuar çdo pistë tjetër të mundshme.
Të dy këto raste kanë rikthyer në vëmendje sfidat e mëdha që përballen individët me probleme shëndetësore, veçanërisht në zonat rurale të vendit, ku aksesimi i shërbimeve të specializuara mjekësore, psikiatrike apo sociale, është shpesh i kufizuar. Mungesa e mbështetjes së duhur, stigmës sociale dhe mungesa e trajtimit afatgjatë, vazhdojnë të jenë faktorë që shpesh çojnë në ngjarje tragjike si këto.
Autoritetet lokale kanë bërë apel për më shumë vëmendje ndaj rasteve të individëve që shfaqin shenja të sëmundjeve mendore apo që përballen me vështirësi të mëdha psikologjike, duke theksuar nevojën për një sistem më të fortë dhe të organizuar të ndihmës sociale dhe ndërhyrjes në kohë.