Një incident tragjik ka ndodhur në provincën veriore të Frizisë në Holandë, ku një balonë me ajër të nxehtë me 34 pasagjerë është rrëzuar gjatë uljes pranë fshatit De Hoeve. Ngjarja ndodhi mbrëmjen e së mërkurës dhe rezultoi me vdekjen e një personi dhe plagosjen e pesë të tjerëve, tre prej të cilëve në gjendje të rëndë.
Sipas dëshmitarëve dhe autoriteteve lokale, balona humbi papritur lartësinë rreth orës 21:00 dhe u përplas disa herë me tokën në një livadh. Forca e përplasjes bëri që pesë pasagjerë të binin nga shporta. Zjarrfikësi dhe punonjësi i shpëtimit, Jan Willem Zwart, theksoi për mediat se “balona u përplas disa herë, duke bërë që njerëzit të binin nga shporta. Ata u lënduan rëndë dhe u dërguan në spital.”
Era e fortë, shkaku i dyshuar i aksidentit
Një zëdhënës i Shoqatës Mbretërore të Aeronautikës Holandeze tha për mediat lokale se një shtrëngatë e papritur ere e shtyu balonën të godiste tokën me forcë. Balona, e cila ishte ngritur nga qyteti i Joure, vlerësohet si një nga më të mëdhatë në Holandë. Shërbimi meteorologjik holandez, KNMI, kishte paralajmëruar për erëra me shpejtësi 10 deri në 14 nyje, por në vendin e ngjarjes u vëzhguan shpejtësi deri në 17 nyje, më të larta se sa pritej.
Në vendngjarje, autoritetet shpallen një emergjencë të shkallës së parë (GRIP 1) dhe ndërhyrja ishte masive, me 14 ambulanca, dy helikopterë traumatologjikë dhe ekipe mjekësore. Viktima e këtij aksidenti është një 66-vjeçare nga komuna frysiane e Opsterland, e cila humbi jetën në vendngjarje. Ajo po festonte përvjetorin e punës së një kolegu. Policia e aviacionit ka nisur një hetim për të zbardhur shkaqet e plota të kësaj tragjedie.