Stuhia e fuqishme që ka përfshirë vendin ka shkaktuar dëme të mëdha edhe në Portin e Durrësit. Era dhe dallgët e forta kanë këputur litarët e tragetit të linjës “Franceska”, i cili po përgatitej për udhëtimin drejt Barit.
Pasagjerët në panik, trageti lëviz 100 metra
Sipas dëshmitarëve, si pasojë e këputjes së litarëve, trageti ka pësuar një lëvizje të papritur, duke u zhvendosur rreth 100 metra nga vendi i tij. Gjithashtu, hekurat e shkëputura kanë rënë mbi anije të tjera, duke krijuar kaos dhe panik në zonë.
Shumë pasagjerë janë bllokuar në makinat e tyre, duke pritur që situata të normalizohet. Për arsye sigurie, udhëtimi i tragetit “Franceska” është pezulluar deri në përmirësimin e kushteve të motit.