Kryeministrit izraelit Benjamin Netanyahu dhe ministrit të Çështjeve Strategjike Ron Dermer iu desh një javë e tërë për të bindur Presidentin e Shteteve të Bashkuara, Donald Trump, të miratonte sulmet ndaj objekteve bërthamore të Iranit, sipas burimeve të sigurta.
Sipas një zyrtari izraelit që foli për The Jerusalem Post, “Katër ditë më parë, pati një telefonatë midis Netanyahut dhe presidentit të SHBA-së, gjatë së cilës Trump tha: ‘kam vendosur të nis një sulm’”. Që kur Izraeli filloi sulmet ndaj lokacioneve bërthamore dhe objektivave të tjera brenda Iranit rreth një javë e gjysmë më parë, Netanyahu dhe presidenti amerikan kanë mbajtur kontakte të shpeshta, duke folur pothuajse çdo ditë.
Burime izraelite dhe amerikane që cituan Washington Post, theksuan se Trump dhe zyrtarët e lartë amerikanë ishin impresionuar nga suksesi i sulmeve fillestare të Izraelit. “Pa arritjet e Izraelit dhe rezultatet e operacionit të tij, presidenti amerikan nuk do ta kishte konsideruar kurrë bashkimin me sulmin”, thanë burimet, duke nënvizuar rolin vendimtar të veprimeve izraelite në bindjen e Trumpit.
Fillimisht, Trump kishte planifikuar vetëm bombardimin e impiantit të pasurimit në Fordow. Megjithatë, një zyrtar izraelit i tha gazetës Washington Post se Netanyahu dhe Dermer arritën ta bindnin atë që të synonte edhe impiantin e Isfahanit dhe vendin e pasurimit në Natanz, të cilat Izraeli i kishte sulmuar tashmë javën e kaluar. “Përfundojeni punën”, mësohet t’i jetë drejtuar Kryeministri izraelit, Presidentit të SHBA-së, duke kërkuar një angazhim më të thelluar amerikan.
Burimi izraelit shtoi se “Amerikanët goditën vende brenda këtyre vendeve që Izraeli kishte vështirësi t’i arrinte”, duke përfshirë “një zonë në Isfahan të fshehur në shpatin e malit, ku iranianët kishin ruajtur uranium të pasuruar dhe infrastrukturë tjetër të lidhur me energjinë bërthamore.”
Të enjten, përveç telefonatës midis Netanyahut dhe Trump, u zhvillua një telefonatë e veçantë midis Zëvendëspresidentit JD Vance, Sekretarit të Mbrojtjes Pete Hegseth dhe zyrtarëve të tjerë të lartë amerikanë me Netanyahun, Dermerin, Ministrin e Mbrojtjes Israel Katz dhe Shefin e Shtabit të IDF-së, Eyal Zamir. Gjatë kësaj telefonate, të zhvilluar pas vendimit të SHBA-së për të sulmuar, amerikanët bënë “disa kërkesa operacionale” nga Izraeli, duke treguar një bashkëpunim të ngushtë në planifikim dhe ekzekutim. “Pati bashkëpunim të plotë midis Izraelit dhe SHBA-së në lidhje me sulmin amerikan. Është e vërtetë që ata e kryen atë, por Izraeli ofroi informacione dhe kontribuoi në suksesin e tij”, tha një burim izraelit për The Post.
Të shtunën në mbrëmje, Netanyahu thirri një konsultim sigurie me disa ministra, duke i informuar ata se presidenti amerikan pritej të godiste centralet bërthamore të Iranit. Takimi zgjati disa orë derisa filloi operacioni amerikan. Në një mbledhje të kabinetit të nesërmen, Dermer tha se qëllimi i Netanyahut për të eliminuar programin bërthamor iranian po realizohej.
Në ditët para operacionit, si Izraeli ashtu edhe SHBA-ja përdorën taktika mashtrimi për të krijuar përshtypjen e një mosmarrëveshjeje të thellë midis dy vendeve nëse SHBA-të do të merrnin pjesë në sulm. Një burim izraelit konfirmoi se u ndërmorën veprime shpërqendruese për të mbajtur sekret planin e sulmit. Kreu i Këshillit të Sigurisë Kombëtare, Tzachi Hanegbi, i tha Komitetit të Punëve të Jashtme dhe Mbrojtjes të Knessetit të dielën: “Ne e dinim për sulmin, nuk ishte një surprizë.”
Sipas zyrtarëve izraelitë, pjesa më e madhe e programit bërthamor të Iranit është shkatërruar ose është dëmtuar rëndë. Megjithatë, kanë mbetur ende disa vende sekondare që vazhdojnë të konsiderohen objektiva. Hanegbi i tha komitetit se “Izraeli është në rrugën e duhur për të arritur 100% të listës së objektivave”.
Pas sulmit amerikan, Izraeli po e zhvendos tani vëmendjen te programi i raketave balistike të Iranit. Hanegbi pranoi se “iranianët ende po prodhojnë raketa” dhe megjithëse disa vende prodhimi janë shkatërruar, ata kanë një aftësi të shpejtë rikuperimi. Një zyrtar i lartë izraelit përmblodhi përpjekjet intensive të Netanyahut dhe Dermerit duke thënë: “Netanyahu dhe Ministri Dermer punuan pa u lodhur, folën me të gjithë dhe në fund ia dolën ta bindnin administratën të përfshihej”, duke theksuar se ata arritën t’i tregonin Trumpit se goditja e objekteve bërthamore të Iranit ishte në përputhje me interesat amerikane dhe se Trump po e përmbushte premtimin e tij për të mos lejuar Iranin të zotërojë armë bërthamore.