Një tërmet me magnitudë 6.9 ka tronditur Japoninë jugore, duke shkaktuar panik dhe duke çuar në paralajmërime për cunami. Lëkundjet u regjistruan në orën 21:19 me orën lokale dhe prekën një pjesë të gjerë të vendit, përfshirë ishullin Kyushu dhe qytetin e Osakës.
Sipas Agjencisë Meteorologjike të Japonisë, epiqendra e tërmetit ishte në një thellësi prej 30 kilometrash nën ujë, pranë bregut juglindor të ishullit Kyushu. Lëkundjet u ndjenë gjerësisht, duke përfshirë ishullin Shikoku dhe zonën midis Hiroshimës dhe Osakës.
Pas tërmetit, autoritetet japoneze lëshuan një paralajmërim për cunami deri në 1 metër për bregun lindor të ishullit Kyushu dhe bregun jugor të ishullit Shikoku. Gjithashtu, një paralajmërim për valë baticash deri në 20 centimetra u dha për ishujt Amami, Tokara, Tanegashima, Yakushima dhe disa zona të Honshut.
Deri më tani, nuk raportohet për viktima apo dëme materiale. Megjithatë, autoritetet mbeten në gatishmëri për të monitoruar situatën dhe për të ndjekur efektet e mundshme të lëkundjeve dhe valëve të cunamit.
Japonia, që ndodhet në zonën e “Unazës së Zjarrit” të Paqësorit, përballet shpesh me tërmete dhe cuname, duke e bërë këtë një ndër vendet më të përgatitura për përballimin e fatkeqësive natyrore.