Panik dhe kaos shpërthyen në zemër të Nju Jorkut, në Times Square, herët në mëngjesin e të shtunës, kur tre persona u qëlluan me armë zjarri. Ngjarja ndodhi në një nga zonat më të populluara të qytetit, duke ndezur alarmin e sigurisë.
Incidenti u regjistrua rreth orës 1:20 të mëngjesit, midis West 44th Street dhe 7th Avenue. Policia dhe ekipet e shpëtimit mbërritën menjëherë në vendngjarje, duke transportuar tre personat e plagosur në Spitalin Bellevue. Të plagosurit, një 18-vjeçare, një 19-vjeçar dhe një 65-vjeçar, ndodhen jashtë rrezikut për jetën dhe janë në gjendje të qëndrueshme.
Hetimet dhe arrestimi i të dyshuarit
Burimet policore konfirmuan se një person i dyshuar për sulmin është arrestuar, por nuk janë dhënë detaje mbi identitetin e tij apo motivet e ngjarjes. Një dëshmitar i pranishëm në vendngjarje raportoi se makina e tij ishte qëlluar dhe se plumbat kishin shpuar xhamat. Policia po vazhdon hetimet për të zbardhur plotësisht rrethanat, ndërsa prania e forcave të rendit mbetet e shtuar në zonën e Times Square.