Situata e zjarreve në Delvinë mbetet kritike, me flakët që vijojnë të rrezikojnë banesat dhe të dëmtojnë shëndetin e banorëve. Gjatë natës dhe mëngjesit të sotëm, disa persona janë asfiksuar nga tymi i dendur, mes tyre edhe nënkryetari i Bashkisë Delvinë, Filip Xuxi. Ai, së bashku me banorët e tjerë, është dërguar menjëherë në spital për të marrë ndihmë mjekësore.
Zjarret kanë djegur tashmë disa banesa dhe rrezikojnë shumë të tjera, pavarësisht përpjekjeve të zjarrfikësve për të neutralizuar flakët.
Urdhër evakuimi dhe ndërhyrje masive, por me vështirësi
Si pasojë e përkeqësimit të situatës, Ministria e Mbrojtjes ka lëshuar sot një urdhër urgjent evakuimi për banorët e Delvinës. Gjatë natës, situata ishte qetësuar, por në mëngjesin e sotëm zjarri u riaktivizua me forcë.
Ministri Pirro Vengu ka bërë të ditur se nga ajri po ndërhyjnë dy helikopterë, ndërsa në terren janë angazhuar qindra trupa të ushtrisë, Policisë së Shtetit, zjarrfikës, vullnetarë dhe banorë të zonës. Pavarësisht angazhimit të madh, terreni i vështirë dhe përhapja e shpejtë e flakëve e bëjnë situatën të vështirë për t’u menaxhuar plotësisht.
