Situata e zjarreve në Gramsh ka arritur një pikë kritike, duke detyruar autoritetet të urdhërojnë evakuimin e menjëhershëm të banorëve në fshatrat Kullollas, Bletëz dhe Menkollarë. Flakët, të cilat po avancohen me shpejtësi, kanë krijuar dy fronte të rrezikshme dhe po i afrohen zonave të banuara, duke rrezikuar jetët e qindra familjeve.
Sipas njoftimit të Ministrisë së Mbrojtjes, në terren janë angazhuar 80 trupa të Forcave të Armatosura në mbështetje të zjarrfikësve vendas, që po punojnë pa pushim për të izoluar vatrat. Për shkak të vështirësisë së terrenit, ndërhyrja ajrore është jetike dhe pritet të nisë së shpejti për të frenuar përhapjen e flakëve.
Shqipëria në luftë me flakët, 19 vatra zjarri aktive
Kjo situatë në Gramsh është pjesë e një tablloje më të gjerë dhe shqetësuese. Sipas njoftimit të fundit të Ministrisë së Mbrojtjes, gjatë 24 orëve të fundit janë evidentuar 50 vatra zjarri, nga të cilat 19 mbeten ende aktive në të gjithë vendin. Situatat më problematike, përveç Gramshit, janë shënuar edhe në:
- Qarkun e Beratit, ku zjarri po rrezikon Azilin e të Moshuarve në Poliçan dhe ka detyruar evakuimin e banorëve të fshatit Plirëz.
- Qarkun e Tiranës, ku flakët në fshatrat Ferraj dhe Zall-Herr po rrezikojnë banesa, ndërsa po ndërhyhet edhe me ndihmën e dy helikopterëve nga Emiratet e Bashkuara Arabe. Një tjetër zjarr masiv ka rënë në zonën e Damjanit dhe Isufajt, ku po punon një avion kroat.
- Qarku i Vlorës, ku zjarri pranë Parkut Natyror të Syrit të Kaltër mbetet aktiv, me ndërhyrje nga avionë grekë dhe helikopterë çekë e sllovakë.
Vazhdimi i temperaturave të larta e bën situatën edhe më të rrezikshme. Me rrezikshmëri “shumë të lartë” të zjarreve të parashikuar në disa zona, autoritetet u bëjnë thirrje qytetarëve të tregojnë kujdes maksimal dhe të njoftojnë menjëherë për çdo vatër zjarri.