Një ngjarje e rëndë ka ndodhur në Ravena të Italisë, ku Astrit Elezi, një 38-vjeçar me origjinë shqiptare, i cili punonte si bujk, është gjetur i pajetë në mes të një are. Elezi, i cili prej kohësh ishte banues në Castel Bolognese, dyshohet se ka humbur jetën si pasojë e një aksidenti fatal në punë.
Sipas raportimeve të mediave italiane, familjarët e 38-vjeçarit, të shqetësuar pasi nuk kishin mundur të kontaktonin me të gjatë ditës së martë, shkuan ta kërkojnë në vendin e tij të punës rreth orës 18:00. Fatkeqësisht, ata e gjetën të pajetë në një arë midis Solarolo dhe Castel Bolognese, ku ai po punonte.
Dinamika e saktë e aksidentit mbetet ende e paqartë dhe pritet të sqarohet pas autopsisë nga ekspertët mjeko-ligjorë. Megjithatë, bazuar në dyshimet paraprake të hetuesve, shqiptari mendohet se është shtypur për vd.ekje nga një traktor. Sipas indicieve, ai mund të ketë marrë goditjen fatale nga piruni i mjetit bujqësor.
Ekipet e emergjencës mjekësore 118 mbërritën menjëherë në vendin e ngjarjes, por fatkeqësisht mjekët nuk mundën të bënin asgjë për të shpëtuar jetën e 38-vjeçarit, duke konstatuar vdekjen e tij në vend.
Prokurori Stefano Stargiotti, i cili po koordinon hetimet, ka urdhëruar sekuestrimin e menjëhershëm të traktorit ku Elezi u gjet i pajetë dhe ka nisur një procedurë penale për vrasje të paqëllimshme kundër personave të panjohur, si një hap standard për të kryer të gjitha verifikimet e nevojshme.
Ndërkohë, rajoni i Emilia Romagna-s, përfaqësuar nga Presidenti Michele de Pascale dhe këshilltari rajonal për politikat e punës Giovanni Paglia, ka shprehur ngushëllimet e tyre për familjen e Astrit Elezit, duke u bashkuar me mesazhet e shumta të punonjësve të bujqësisë, sindikatave dhe qytetarëve të Castel Bolognese. Ata kanë theksuar rëndësinë e shëndetit dhe sigurisë në vendin e punës dhe kanë bërë thirrje për kushte pune më të sigurta dhe një trajtim më të mirë të punonjësve. Ngushëllime ka shprehur edhe presidentja e Provincës, Valentina Palli, si dhe përfaqësues të tjerë vendorë.
Mediat italiane kanë ngritur shqetësimin për numrin e lartë të aksidenteve në punë në provincën e Ravenës, ku në vitin 2024 u regjistruan 7,017 aksidente, një rritje prej 2.1% krahasuar me vitin 2023. Për më tepër, në tre muajt e parë të vitit 2025, aksidentet kanë shënuar një rritje tjetër prej 3.9%. Kjo ngjarje tragjike e Astrit Elezit vjen si një tjetër kujtesë e nevojës urgjente për të forcuar masat e sigurisë në vendin e punës.
