Një shpërthim i fuqishëm ka tronditur orët e para të mëngjesit të së martës fshatin Gurëz, në njësinë administrative Fushë Kuqe të Kurbinit. Rreth orës 04:20, një sasi e vogël lënde plasëse, e dyshuar si artizanale, është hedhur në portën e jashtme të një banese, duke shkaktuar vetëm dëme të lehta materiale.
Policia e Shtetit, menjëherë pas njoftimit, mbërriti në vendngjarje së bashku me grupin hetimor. Nga këqyrja paraprake, u konstatua se porta e banesës së shtetases M.D., alias M.B., ishte dëmtuar lehtë nga shpërthimi.
Ajo që e bën më misterioze këtë ngjarje është gjetja e disa gëzhojave në rrugë, në afërsi të banesës. Edhe pse në dukje të vjetra, ato u sekuestruan dhe po analizohen si prova materiale.