Kryeministri Edi Rama ka reaguar ashpër ndaj fenomenit të zjarrvënieve, duke falënderuar publikisht Policinë e Shtetit për ndërhyrjet e shpejta dhe arrestimin e personave përgjegjës. Ai i cilësoi zjarrvënësit si “psikopatë dhe kriminelë”.
Paralajmërim i Ramës: 30 vjet ndalim i lejeve të ndërtimit në zonat e djegura
Rama paralajmëroi masa ekstreme dhe afatgjata ndëshkuese kundër atyre që vënë zjarre me synimin për të përfituar nga hapësirat e djegura dhe për t’i shfrytëzuar ato për ndërtim.
Kryeministri theksoi se masat do të synojnë të shmangin çdo lloj favorizimi të mundshëm pas djegies:
“Aty ku vihet zjarr, do të ndalet leje ndërtimi për 30 vjet. Nëse një territor hap oreks për të ndërtuar, digjet, aty për 30 vite s’do të jepet leja e ndërtimit. Që ta kenë të qartë të gjithë, se djegia nuk të sjell këto favorizime. 30 vjet do të ndalohet dhënia e lejes së ndërtimit dhe ai territor do të rimbillet,” u shpreh Rama.
Ai shtoi se duhet rritur “forca goditëse e policisë” dhe puna operative në terren për të identifikuar personat potencialisht të rrezikshëm.