Profesori i kriminalistikës dhe eksperti i sigurisë, Ervin Karamuço, ngriti një kritikë të ashpër ndaj kreut të SPAK-ut, Altin Dumani, duke i bërë thirrje publike që të mbajë përgjegjësi dhe të dalë para mediave për të sqaruar publikisht çfarë funksionoi dhe çfarë dështoi me task-forcën e ngritur për parandalimin e krimeve zgjedhore.
I ftuar në emisionin “Now” në Euronews Albania, Karamuço tha se strukturat e drejtësisë së re kishin premtuar një qasje proaktive dhe goditje konkrete kundër çdo tentative për shitblerje votash, por sipas tij, asnjë nga këto objektiva nuk u përmbush në praktikë, ndërkohë që SPAK, në vend që të vepronte në mënyrë të barabartë ndaj të gjithë subjekteve, u fokusua vetëm tek një parti – Partia Socialdemokrate e Tom Doshit.
“Altin Dumani ishte i vetmi që në janar doli dhe tha se do të kishte arrestime në flagrancë para zgjedhjeve. E kam thënë dhe po e përsëris: arrestimi në flagrancë kërkon një rrjet të gjerë informativ, infiltrime, bashkëpunim me terrenin. Dhe çfarë ndodhi? Asgjë. Vetëm një rast në Fier, kaq! As Shkodra, as Malësia e Madhe, as Tirana, as Elbasani, as Korça – kontrolle kishte, por rezultate jo.”
Karamuço theksoi se premtimet publike të SPAK-ut për tolerancë zero ndaj krimeve zgjedhore ishin të zhurmshme në letër, por u shuan pa zë në terren. Ai kërkoi që Dumani, si drejtues i institucionit, të mbajë përgjegjësi për mosrealizimin e planit të veprimit të prezantuar me bujë në fillim të vitit.
“Dumani duhet të dalë dhe të tregojë vetë se çfarë ka shkuar keq në planin që vetë e prezantoi në janar. Pse nuk u bë asgjë? Ku ishin burimet? Ku ishin informacionet? Ku ishin arrestimet që u premtuan? Nuk mund të dalësh para shqiptarëve dhe të flasësh për goditje, e pastaj të tërhiqesh në heshtje kur realiteti të përgënjeshtron.”
Në mënyrë të veçantë, profesori nënvizoi se përqendrimi i SPAK vetëm në rastin e PSD-së ka krijuar një perceptim të fortë publik për selektivitet dhe për përdorim të drejtësisë si mjet politik. Ai kërkoi shpjegime të qarta përse SPAK nuk e shtriu kontrollin në mënyrë të barabartë ndaj të gjitha partive, përfshirë edhe forcat kryesore që qarkullojnë pushtetin.
“SPAK është marrë vetëm me PSD-në. E gjithë task-forca, të gjitha hetimet, duket se janë drejtuar vetëm tek një adresë. Pse? Pse nuk u veprua në të njëjtën mënyrë edhe ndaj strukturave të PS-së apo denoncimeve që kishin të bënin me PD-në apo me grupe të tjera? Këto janë pyetje që nuk mund të mbeten pa përgjigje. Dumani duhet të flasë.”
Në përfundim të deklaratës së tij, Karamuço dha një mesazh të qartë: nëse SPAK-u dëshiron të ruajë kredibilitetin tek publiku, duhet të dalë dhe të japë llogari për premtimet që vetë i bëri, për ndjekjet që nuk i ndërmorri dhe për drejtësinë që nuk e solli. Në të kundërt, sipas tij, strukturat e drejtësisë do të vazhdojnë të perceptohen si të kapura, të frikësuara ose të njëanshme – dhe kjo është një plagë e rrezikshme për shtetin ligjor.