Një ngjarje e pazakontë ka ndodhur në qytetin antik të Beratit, një vend i njohur për thesaret e tij historike, jo vetëm mbi tokë, por edhe nën të. Teksa po zgjerohej një banesë familjare, një baba dhe djali i tij janë përballur me një zbulim që mund të ketë vlerë të jashtëzakonshme arkeologjike.
Sipas denoncimit të bërë në redaksinë e JOQ Albania, familja kishte vendosur të shtonte dy dhoma në shtëpinë e tyre. Por gjatë hapjes së themeleve, punimet morën një kthesë të papritur: nga dheu dolën dy qypa të mëdhenj të mbushur plot, mes të cilëve gjendeshin edhe monedha të shumta metalike, që në pamje të parë dukeshin të vjetra dhe të oksiduara.
“Nuk dimë nëse kanë vlerë apo jo”
Në mesazhin dërguar JOQ Albania, familja tregon:
“Vendosëm të shtonim dy dhoma në shtëpi dhe kur babi me vëllain gërmuan për të hapur themelin, ja se çfarë doli. A mund të na thotë ndokush çfarë mund të jenë, a kanë vlerë apo t’i hedhim?”
Nga foto që ata kanë dërguar, duket se qypat janë të vjetër, ndërsa monedhat kanë forma të ndryshme, disa me mbishkrime që nuk janë të lexueshme në mënyrë të qartë.
Nevojitet ekspertizë arkeologjike
Burime lokale thonë se ky zbulim duhet t’i nënshtrohet një ekspertize arkeologjike për të përcaktuar vlerën reale të monedhave. Specialistët e trashëgimisë kulturore theksojnë se zona e Beratit është e pasur me objekte që datojnë që nga periudha ilire dhe romake, ndaj është shumë e mundshme që monedhat të kenë vlerë historike dhe muzeale.
Nëse zbulimi konfirmohet si autentik, ai do të ishte një ndër gjetjet më interesante të viteve të fundit në këtë qytet të mbrojtur nga UNESCO.
Berati, qytet i historisë dhe mistereve
Ky rast rikujton edhe njëherë faktin se Berati mbart pasuri të paçmuara nën tokë, të mbetura nga shekuj të tërë historish, tregtish dhe civilizimesh. Çdo gërmim, sado i vogël, mund të sjellë në dritë një copëz të së kaluarës.
Për momentin, familja që bëri zbulimin është në pritje të një përgjigjeje nga autoritetet dhe nga ekspertët që do të përcaktojnë nëse monedhat kanë vlerë antike apo janë thjesht objekte pa rëndësi historike.
