Ish-presidenti amerikan Donald Trump ka reaguar ashpër pas vrasjes së Iryna Zarutska, një refugjate 23-vjeçare nga Ukraina, e cila u ther për vdekje në një tren në Karolinën e Veriut. Autori i dyshuar, DeCarlos Brown, ishte një person me histori të gjatë kriminale dhe probleme të rënda mendore, një fakt që shkaktoi një reagim të fortë nga ana e Trump.
Në një postim në rrjetin social Truth Social, Trump e cilësoi ngjarjen si “të tmerrshme” dhe fajësoi politikën e lirimit me kusht pa garanci (cashless bail) të demokratëve. Ai theksoi se viktima kishte ikur nga lufta, por u vra barbarisht nga një “i çmendur me histori kriminale” që ishte liruar nga burgu pavarësisht 14 arrestimeve të mëparshme.
“Gjaku i kësaj gruaje të pafajshme… tani është në duart e Demokratëve që refuzojnë të fusin kriminelët në burg,” shkroi Trump.
Ai i bëri thirrje publikut të votojë për kandidatin republikan Michael Whatley, duke theksuar se “vetëm republikanët do të sjellin LIGJ DHE REND”. Reagimi i tij ka ndezur një debat të fortë në skenën politike dhe publike, duke vënë në qendër të vëmendjes dështimet e sistemit ligjor amerikan për të mbajtur nën kontroll individët e rrezikshëm.
Iryna Zarutska kishte ardhur në SHBA me shpresën për një jetë më të mirë, por fati i saj tragjik ka tronditur ndërgjegjen e publikut amerikan dhe ndërkombëtar. Autori i krimit, DeCarlos Brown, ndodhet në paraburgim, i akuzuar për vrasje të shkallës së parë.