Aktorja Delinda Disha ka ndarë për herë të parë rrëfimin e plotë për një nga periudhat më të errëta në jetën e saj personale, kur humbi binjakët gjatë shtatzënisë.
E ftuar në një intervistë, ajo foli për dhimbjen e humbjes, pritjet, dhe mënyrën se si ka përballuar këtë sfidë me forcë dhe përkushtim si nënë.
Delinda, tashmë nënë e dy djemve – Dasantinit dhe Kostandinit – tregoi se ishte në pritje të dy fëmijëve të tjerë, një djalë dhe një vajzë, por shtatzënia përfundoi tragjikisht në muajin e katërt.
“Ishte shumë e bukur… lajmin unë e bëra publik nga gëzimi i madh që kisha. Kur mendon për një fëmijë dhe merr vesh që do bëhesh me dy, aq më tepër binjakë… ishte e jashtëzakonshme. Por fatkeqësisht, gjërat nuk shkuan siç i kishim ëndërruar.”
Aktorja kujton se zbulimi i parë për diçka që nuk shkonte erdhi gjatë një kontrolli rutinë. “Mjekja më tha se njërit nga binjakët nuk i rrihte më zemra. Dhe më pas, u përqendruam te shpëtimi i tjetrit. Por nuk vonoi shumë dhe humbi jetën edhe ai.”
Ajo tregon se vendosi të fshinte postimet në rrjete sociale vetëm për shkak të pyetjeve të shumta dhe të rënda që i bëheshin në atë kohë. “Nuk duroja dot pyetjet. Ishin të tepërta dhe të dhimbshme. Por kujtimi i tyre do të më shoqërojë gjithnjë.”
Në fund, Delinda e përmbyll rrëfimin e saj me një reflektim të thellë mbi forcën që gjen në mëmësinë dhe dashurinë për familjen: “Ndoshta duhet të ndodhte kjo që të kuptosh që ti je e fortë. Ti do ia dalësh.”
Orinda Huta: Si e ka ndjerë Dasantini?
Delinda Disha: Dasantini, me zor e priste. Kishte kohë që thoshte dua motër, dua vëlla. Edhe pasi i shpjeguam humbjen e binjakëve, e përjetoi pak. “Po ju s’më keni treguar, përse s’më keni thënë”. Të gjitha lodrat e mia i kam për ty.
Huta: Dasantianit i duket sikur i ka ikur vëmendja tani që ka ardhur në jetë vëllai i tij?
Delinda Disha: Në fillim pak, por jo. Ndoshta ngaqë tani është edhe me shkollën, klasa e parë. Ka filluar, është me detyra edhe nuk është me kohë të plotë, që ta ndjente xhelozinë.