Departamenti Amerikan i Shtetit ka lëshuar një paralajmërim për të gjithë qytetarët amerikanë në mbarë botën, duke i këshilluar të tregojnë kujdes të shtuar pas nisjes së operacioneve ushtarake të SHBA-së në Iran.
Sipas njoftimit zyrtar, amerikanët në mbarë botën, veçanërisht në Lindjen e Mesme, duhet të ndjekin udhëzimet e ambasadave dhe konsullatave amerikane për sigurinë.
Paralajmërim për udhëtimet dhe mbylljen e hapësirave ajrore
Departamenti i Shtetit paralajmëroi se qytetarët amerikanë mund të përballen me probleme në udhëtime për shkak të mbylljeve të përkohshme të hapësirave ajrore dhe situatës së sigurisë.
Thirrje për regjistrim në sistemin e sigurisë STEP
Qytetarët amerikanë janë këshilluar gjithashtu të regjistrohen në programin Smart Traveler Enrollment Program (STEP), për të marrë njoftime të fundit për sigurinë nga ambasadat dhe konsullatat amerikane.
Amerikanët që ndodhen në Lindjen e Mesme duhet të ndjekin udhëzimet e ambasadës më të afërt dhe të kontaktojnë linjat e emergjencës për ndihmë dhe informacione për mundësitë e kthimit të sigurt në vend.
Departamenti i Shtetit ka publikuar edhe numrat e emergjencës për qytetarët amerikanë:
- +1-202-501-4444 (nga jashtë SHBA)
- +1-888-407-4747 (nga SHBA dhe Kanada)
Ndërkohë, Ambasada e SHBA në Tiranë ka vënë në dispozicion edhe kontaktet për ndihmë konsullore për qytetarët amerikanë që ndodhen në Shqipëri.
Zyrtarët amerikanë theksojnë se situata e sigurisë mund të ndryshojë shpejt dhe qytetarët duhet të ndjekin vazhdimisht njoftimet zyrtare.