Një ngjarje tragjike ka tronditur mbrëmjen e sotme qytetin e Durrësit. Rreth orës 19:00, në lagjen nr.17, një burrë rreth të 45-ave është gjetur i vetëvarur në banesën e tij. Lajmi i hidhur është konfirmuar fillimisht nga familjarët, të cilët të tmerruar kanë njoftuar menjëherë Policinë e Shtetit.
Forcat e policisë kanë mbërritur menjëherë në vendngjarje, ku kanë konstatuar se bëhej fjalë për një akt të dyshuar vetëvrasjeje. Viktima është identifikuar si shtetasi A. P., 45 vjeç.
Ende nuk ka detaje rreth motiveve që e shtynë atë drejt këtij vendimi fatal, ndërsa burime jozyrtare bëjnë me dije se hetuesit po marrin në pyetje të afërm dhe persona të tjerë të njohur të tij për të mësuar më shumë mbi gjendjen emocionale dhe rrethanat e fundit në jetën e viktimës.
Policia ka bërë të ditur në njoftimin zyrtar:
“Rreth orës 19:00, në lagjen nr.17 në Durrës, në banesë është gjetur nga familjarët, dyshohet i vetëvarur, shtetasi A. P, rreth 45 vjeç. Grupi hetimor ndodhet në vendngjarje dhe po punon për sqarimin e plotë të rrethanave.”
Ngjarja ka lënë të tronditur jo vetëm familjarët e viktimës, por edhe komunitetin përreth, pasi fqinjët shprehen se burri nuk kishte shfaqur shenja të dukshme që të tregonin për një gjendje të rënduar.
Autoritetet kanë nisur procedurat ligjore dhe pritet që ekspertiza mjeko-ligjore të përcaktojë nëse kemi të bëjmë me vetëvrasje apo nëse ngjarja ka rrethana të tjera të fshehura.