Një 34-vjeçar shqiptar ka humbur jetën në rrethana misterioze, vetëm pak orë pasi u shpëtua nga mbytja në pishinën e hotelit ‘Ermitage’ në Jesolo të Venecias. Pavarësisht ndërhyrjes së shpejtë të karabinierëve dhe mjekëve, gjendja e tij u përkeqësua papritur gjatë natës, duke çuar në vdekjen e tij më 11 gusht.
Sipas dëshmitarëve, i riu u pa në vështirësi në pishinë, duke luftuar për mbijetesë. Një patrullë karabinierësh që ndodhej pranë vendit të ngjarjes ndërhyri menjëherë, e nxori nga uji dhe i dha ndihmën e parë, përfshirë edhe reanimimin kardiopulmonar (CPR). Fillimisht, dukej sikur i kishte kaluar rreziku i asfiksimit dhe u dërgua në spitalin San Donà për mjekim të mëtejshëm.
Pasi arriti në spital, ekipi mjekësor vuri re se askush nuk e njihte apo nuk e kishte parë më parë. Më tej, u konstatua se viktima nuk ishte i regjistruar si klient i hotelit dhe as pjesë e stafit. Kjo ka ngjallur dyshime të forta tek autoritetet dhe ka çuar në hapjen e menjëhershme të një hetimi.
Dyshimet paraprake të Policisë italiane janë se i riu mund të ketë qenë nën ndikimin e alkoolit ose drogës, por nuk përjashtohen as problemet shëndetësore të panjohura. Për të përcaktuar shkakun e saktë të vdekjes, trupi i pajetë i është nënshtruar ekspertizës mjeko-ligjore. Emri i viktimës nuk është bërë i ditur.
Zyra e prokurorit në Venecia është vënë në dijeni për incidentin dhe hetimet janë në proces. Kërkohet të zbulohet se si ka arritur i riu në hotel dhe nëse ka hyrë fshehurazi, ose nëse ishte i ndjekur apo kërcënuar nga dikush.