Kryeministri izraelit Benjamin Netanyahu ka lëvduar publikisht sulmet e presidentit të Shteteve të Bashkuara, Donald Trump, ndaj objekteve bërthamore iraniane, duke i cilësuar ato si një “vendim të guximshëm” dhe një moment potencialisht historik për rajonin e Lindjes së Mesme.
Në një mesazh të shpërndarë pas sulmeve, Netanyahu iu drejtua Presidentit Trump me fjalët “Urime, president Trump”. Ai më tej shtoi se “Vendimi juaj i guximshëm për të shënjestruar objektet bërthamore të Iranit me fuqinë e mrekullueshme dhe të drejtë të Shteteve të Bashkuara të Amerikës do të ndryshojë historinë”.
Kryeministri izraelit vuri në dukje rolin e Izraelit në operacionin e përgjithshëm kundër Iranit, duke thënë se “Në operacionin “Rising Lion”, Izraeli ka bërë gjëra vërtet të mahnitshme. Por në aktin kundër objekteve bërthamore të Iranit, Amerika ka qenë vërtet e pakrahasueshme”.
Netanyahu theksoi se historia do të shënojë veprimin e Presidentit Trump si një përpjekje për të privuar “regjimin më të rrezikshëm në botë” nga posedimi i “armëve më të rrezikshme në botë”.
Në fjalimin e tij drejtuar kombit nga Shtëpia e Bardhë, Presidenti Trump kishte deklaruar se SHBA dhe Izraeli kishin punuar si një ekip për të eleminuar atë që ai e quajti një kërcënim të tmerrshëm ndaj Izraelit. Ai i përshkroi sulmet si një “sukses spektakolar ushtarak”, duke pretenduar se vendet kryesore të pasurimit të uraniumit të Iranit ishin shkatërruar plotësisht.
Netanyahu e vlerësoi lidershipin e Presidentit Trump si një kthesë në histori, duke sugjeruar se ky veprim mund të hapë rrugën për paqe dhe prosperitet në Lindjen e Mesme dhe më gjerë. Ai përfundoi duke cituar një thënie të përbashkët me Presidentin Trump: “Unë dhe presidenti Trump shpesh themi: Paqe përmes forcës. Së pari vjen forca, pastaj vjen paqja. Dhe sonte, presidenti Trump dhe Shtetet e Bashkuara të Amerikës vepruan me shumë forcë”.