Pas një fillimi të freskët të pjesës së dytë të gushtit, moti në Shqipëri do të jetë i paqëndrueshëm këtë javë. Meteorologia Lajda Porja njoftoi se do të ketë alternime midis kthjellimeve, vranësirave dhe reshjeve të izoluara shiu, kryesisht në zonat malore të juglindjes dhe verilindjes, ku reshjet do të jenë më të shpeshta. Temperaturat gjatë kësaj periudhe do të luhaten mes 31 dhe 34 gradë Celsius.
Megjithatë, Porja paralajmëroi se kjo situatë do të ndryshojë shpejt. Java e fundit e gushtit do të sjellë masa të nxehta ajrore nga Afrika, të cilat pritet të rrisin ndjeshëm temperaturat, duke arritur deri në 39 gradë Celsius. Kjo valë nxehtësie parashikohet të zgjasë edhe gjatë javës së parë të shtatorit.
Parashikimi ditor në detaje
Meteorologia Porja tha se dita e sotme ka nisur me kthjellime, ndërsa gjatë ditëve në vijim do të ketë alternime midis vranësirave dhe lagështirës. E marta dhe e mërkura do të kenë temperatura në nivelet aktuale, ndërsa të enjten do të shënohet një rritje graduale, sidomos në qarqe si Shkodra, Berati, Elbasani dhe Gjirokastra.
Për ata që do të kalojnë pushimet në bregdet, moti do të jetë më i qëndrueshëm. Nga e marta deri të enjten, bregdeti do të ketë kryesisht mot me diell dhe vranësira në Velipojë, Shëngjin, Durrës, Sarandë dhe Ksamil, ndërsa zona e Vlorës pritet të jetë pa reshje.
Ndërkohë, në zonat malore, ku reshjet janë më të shpeshta, temperaturat do të luhaten mes 31 dhe 34 gradë Celsius, një ndryshim i vogël nga ditët e fundit.