Kryeministri Edi Rama ka reaguar për arrestimet e fundit që kanë tronditur skenën politike shqiptare, gjatë një interviste në emisionin “Top Story”. I përballur me akuzat për qëndrim me dy standarde ndaj drejtësisë, Rama mbrojti veten duke theksuar se ndërhyn vetëm për vendimet që janë të formës së prerë, dhe jo për hetime apo procese ende në zhvillim.
Gjatë bisedës me gazetarët, Rama insistoi se drejtësia në Shqipëri ka bërë përmirësime të ndjeshme gjatë 12 viteve të fundit, edhe pse, sipas tij, garancia përfundimtare për barazinë para ligjit do të vijë vetëm kur vendi të anëtarësohet në Bashkimin Evropian.
Duke komentuar rastin e ish-deputetit demokrat Ervin Salianji, i dënuar për kallëzim të rremë në lidhje me çështjen “Babale”, Rama nuk e fshehu kënaqësinë. Ai e quajti vendimin e gjykatës “të merituar”, madje shkoi më tej duke thënë se “mirë do ishte t’i kishte ndodhur edhe ndonjë tjetri”.
“Rasti i Salianjit është një vendim historik për drejtësinë dhe për luftën kundër shitjes së shpifjes si politikë. Ai është dënuar me meritë të plotë. Mezi e prita që në Shqipëri të ndodhte një dënim për shpifje,” – deklaroi kreu i qeverisë.
Gazetarët e emisionit nuk ngurruan ta sfidojnë kryeministrin për heshtjen e tij kur bëhet fjalë për çështje që prekin eksponentë të Partisë Socialiste apo njerëz të afërt me të. Rama nuk dha përgjigje të drejtpërdrejtë, por u përpoq të ruajë pozicionin institucional, duke theksuar se “nuk komenton procese në zhvillim, por vetëm vendimet përfundimtare”.
Megjithatë, kjo nuk e ndaloi të komentojë rastin Salianji me tone të ashpra politike, çka është interpretuar nga kritikët si konfirmim i standardit të dyfishtë që kryeministri dhe mazhoranca aplikojnë ndaj drejtësisë: të ashpër kur godet opozitën, të heshtur kur preket pushteti.
Në një përpjekje për të justifikuar mangësitë aktuale të sistemit të drejtësisë, Rama theksoi se anëtarësimi në Bashkimin Evropian është garancia përfundimtare për funksionimin e barabartë të ligjit në Shqipëri. Por kjo deklaratë u prit me skepticizëm nga komentuesit politikë, të cilët e shohin këtë si një zhvendosje të përgjegjësisë drejt një procesi që ende nuk ka një afat të qartë.
Në fund, deklaratat e Ramës rihapin debatin mbi besueshmërinë dhe pavarësinë e drejtësisë në Shqipëri, në një kohë kur publiku kërkon prova reale që reforma në drejtësi nuk është vetëm retorikë, por instrument për drejtësi të barabartë — pa parti, pa mbështetës dhe pa “të përkëdhelur”.