Deputetja socialiste Klotilda Bushka ka reaguar pas publikimit të disa mesazheve në media, ku pretendohet se ajo është duke komunikuar me Naureda Llagamin lidhur me aktivitetet e SPAK-ut.
Në mesazhe pretendohet se ajo diskutonte për mënyrën e “kapjes së SPAK” duke futur brenda kësaj strukture njerëz të saj, ndonëse vlen të theksohet se vërtetësia e këtyre mesazheve nuk është provuar ende.
Në reagimin e saj, Bushka thotë se këto mesazhe janë tërësisht të pavërteta si dhe paralajmëron ndjekien e hapave ligjorë ndaj publikuesve të tyre.
“Në respekt të miqve, dashamirësve dhe të gjithë atyre që më njohin dhe që më kanë besuar votën e tyre, ndjej detyrimin të sqaroj se shpifjet dhe balta që po hidhet ndaj meje nga media të caktuara janë tërësisht të pavërteta.
Këto janë sajesa me qëllime të caktuara dhe nuk kanë asnjë bazë në realitet. Për këtë arsye, që nesër do të ndjek të gjitha rrugët ligjore për të vënë drejtësinë në vend.
E vërteta nuk mund të fshihet nga gënjeshtra”, shkruan ajo.