Reperi i njohur shqiptar, Rigels Rajku, i njohur ndryshe si Noizy, është arrestuar të shtunën, më 5 korrik, në aeroportin e Zyrihut nga autoritetet zvicerane. Sipas raportimeve të mediave lokale, ndalimi i 38-vjeçarit është urdhëruar nga Zyra e Prokurorit Publik për Krime të Rënda të Dhunshme.
Portali Watson.ch ka njoftuar se ndaj Noizyt rëndojnë disa akuza penale dhe prokuroria ka kërkuar caktimin e masës së paraburgimit për të. Megjithatë, vendimi përfundimtar nga gjykata zvicerane ende nuk është dhënë, dhe reperi, deri në një vendim të kundërt, mbetet i prezumuar i pafajshëm.
Arrestimi i Noizyt ka tronditur fansat e tij dhe komunitetin e artistëve shqiptarë në diasporë. Reperi kishte planifikuar të performonte në një event të paralajmëruar në “Rinora 4” në Rümlang, por pas arrestimit të tij, koncerti është anuluar dhe të gjitha postimet promocionale lidhur me këtë ngjarje janë fshirë nga rrjetet sociale.
Përtej karrierës së tij muzikore, Noizy shpesh është përmendur edhe për lidhjen e tij me sferën politike në Shqipëri. Ai është parë disa herë në skenë gjatë fushatave elektorale duke mbështetur Kryeministrin Edi Rama, një fakt ky që ka rikthyer debatet në opinionin publik pas lajmit të arrestimit.
Aktualisht, Noizy ndodhet në Zvicër në pritje të vendimit të gjykatës lidhur me kërkesën e prokurorisë për qëndrimin e tij në paraburgim. Detaje të tjera rreth akuzave specifike ndaj tij ende nuk janë bërë publike.