“Arkitekti” i Partisë Socialiste dhe një nga politikanët më të rëndësishëm të Shqipërisë, Fatos Nano ka mbyllur sytë përgjithmonë këtë të premte, datë 31 Tetor rreth orës 14:00, në ambientet e një spitali privat ku qëndronte në terapi intensive prej ditësh.
Lideri historik i së majtës shqiptare, me ikjen e tij ka lënë në trishtim familjen e parë dhe atë politike, bashkëpunëtorët e shumtë dhe miqtë e pafundëm.
Neësbomb.al sjell një video të rrallë të agjencisë ndërkombëtare të lajmeve “Associated Press” të datës 15 Dhjetor 1995, e cila është pa koment dhe tregon momentin kur Fatos Nano mbërrin pranë shtëpisë së tij në Tiranë, pasi kishte marrë 17 orë lejë nga burgu i Bançës në Tepelenë, për t’i dhënë lamtumirën e fundit nënës, Marias.
Sali Berisha, në atë kohë Presidenti i Shqipërisë, i akuzuar se ishte pikërisht njeriu që e burgosi, i dha leje që të përcillte nënën nga shtëpia për në banesën e fundit, në Sharrë.
Video e “Associated Press” tregon sesi Fatos Nano u ruajt me masa të rrepta sigurie, i shoqëruar edhe nga Paulin Sterkaj atëkohë shefi i repartit special të policisë “Brisku”, i cili gjatë gjithë kohës e mban prej krahu.
Në ato pak orë lire, ai u takua me familjarët, një pjesë të të cilëve nuk i kishte parë qyshkur u burgos në vitin 1993. Megjithatë, ai nuk harroi të falenderonte autoritetet që i dhanë leje në ato momente të vështira, pasi situata politike ishte shumë e tensionuar.
“Dua të falënderoj autoritetet që më dhanë mundësinë t’i jap lamtumirën e fundit, bashkë me njerëzit e mi më të afërt, nënës sime. I falënderoj sepse do të përgëzoja faktin që ata e njohin armëpushimin. Para vdekjes dhe hasmit ulin armët. Do të doja që këtë ta bënin edhe përballë të gjallëve”, shprehet lideri historik pas ceremonisë mortore.
Sipas njerëzve që ishin pranë Fatos Nanos atë periudhë dhe agjencisë ndërkombëtare të lajmeve “Associated Press”, në varrimin e Maria Nanos, nënës së kryetarit të burgosur të Partisë Socialiste ishin të pranishëm më shumë se 5.000 persona dhe ai u prit si hero në Tiranë.