Me publikimin e buletinit të parë të vizave për vitin fiskal 2026, janë zbuluar detaje të rëndësishme për fituesit e Lotarisë Amerikane (DV-2026). Sipas burimeve zyrtare nga Departamenti i Shtetit të SHBA-së, ky buletin shënon një fillim të shkëlqyer për rajonin e Evropës, me numrin fillestar të lëshimit të vizave që arrin deri në 7750.
Ky zhvillim vjen menjëherë pas përfundimit të vitit fiskal 2025, ku sipas buletinit të vizave, numri maksimal i vizave të lëshuara për Evropën u mbyll në 23,000. Për fituesit e DV-2026, ky është një sinjal pozitiv, duke sugjeruar se ritmi i intervistave do të jetë i lartë, duke rritur kështu mundësitë për ata me numra më të lartë të rastit.
Pritshmëritë për DV-2026 dhe situata e rajonit të Azisë
Shumë ekspertë të fushës shprehen optimistë se ky ritëm do të vazhdojë, duke shpresuar që në fund të vitit të mbyllet me statusin “Current”, çka do të thotë se të gjithë fituesit do të kenë mundësinë të intervistohen. Ecuria e vitit të fundit, ku numrat për Evropën për DV-2025 arritën në 23,000, dhe numrat e DV-2026 fillojnë me 7750, krijon një pritshmëri të lartë.
Një tjetër tregues i rëndësishëm vjen nga rajoni i Azisë, i cili ka filluar me një numër prej 10,000 në muajin e parë. Ky është një numër i konsiderueshëm, duke e krahasuar me vitet e mëparshme, ku arritja e këtij numri kërkonte disa muaj.
Ndërkohë, Departamenti i Shtetit, në faqen zyrtare të tij, nuk ka bërë ende publik numrin total të fituesve të DV-2026. Ky informacion pritet të publikohet në një kohë të mëvonshme dhe do të jetë kyç për të vlerësuar ecurinë e përgjithshme të programit për këtë vit.
Udhëzime për fituesit e DV-2026
Për fituesit e DV-2026 me numra rasti nga 1 deri në 7750, tashmë ka filluar periudha e pritjes së njoftimeve për intervistë. Aplikantët duhet të kontrollojnë rregullisht email-et e tyre, pasi njoftimet do të dërgohen nga sot deri më 31 gusht. Këto njoftime do të përcaktojnë datën, orën dhe vendin e intervistës për muajin tetor.
Ndërsa sa i përket bashkimeve familjare, tabelat nuk kanë shënuar asnjë avancim, duke mbetur në të njëjtat data si më parë. Aplikantët për këtë kategori duhet të vazhdojnë të monitorojnë me kujdes buletinet e vizave për përditësimet e ardhshme.