Një ndryshim i rëndësishëm mund të ndodhë së shpejti për të gjithë ata që ëndërrojnë një të ardhme në Shtetet e Bashkuara të Amerikës përmes Lotarisë Amerikane. Një draft-ligj i ri, aktualisht në proces shqyrtimi nga autoritetet federale në SHBA, parashikon vendosjen e tarifave të detyrueshme për pjesëmarrjen në programin e vizave të diversitetit (DV Program), i njohur ndryshe si “Lotaria Amerikane”.
Në dokumentin zyrtar thuhet se:
“Përveç çdo tarife tjetër të autorizuar me ligj, Sekretari i Sigurisë Kombëtare do të vendosë një tarifë për çdo të huaj që regjistrohet për programin e vizave të imigracionit të diversitetit, siç përshkruhet në seksionin 203(c) të Aktit të Imigracionit dhe Shtetësisë, në shumën e specifikuar në këtë nënseksion në kohën e regjistrimit.”
Sipas përmbajtjes së draftit, tarifa e re për aplikimin në Lotarinë Amerikane nuk do të jetë më e ulët se 250 dollarë për person. Kjo do të përbëjë një ndryshim thelbësor nga sistemi aktual, i cili e lejon regjistrimin në mënyrë falas nëpërmjet faqes zyrtare të Departamentit të Shtetit. Me këtë iniciativë të re ligjore, autoritetet amerikane synojnë të krijojnë një filtër shtesë ekonomik dhe të mbulojnë kostot administrative të këtij programi, i cili përfshin mijëra aplikime çdo vit nga mbarë bota.
Por kjo nuk është e vetmja tarifë që pritet të ndryshojë. Drafti parashikon gjithashtu një rritje të ndjeshme të kostos së aplikimit për vizë në Ambasadën Amerikane. Tarifa për përpunimin e aplikimeve për vizë, e cila aktualisht varion sipas kategorisë së vizës, do të ngrihet në një minimum prej 400 dollarësh për person, duke filluar nga viti fiskal 2025.
Në tekstin e draftit thuhet:
“Shuma e specifikuar në këtë nënseksion për vitin fiskal 2025 do të jetë ajo shumë që Sekretari mund të parashikojë me rregullore, por në çdo rast jo më pak se 400 dollarë.”
Nëse ky projektligj miratohet, ai do të përfaqësojë një kthesë të madhe në mënyrën se si funksionon një nga rrugët më të preferuara të emigrimit në SHBA për qytetarët nga vendet me përfaqësim të ulët në imigracionin amerikan, përfshirë edhe Shqipërinë.
Shumë ekspertë e kanë cilësuar këtë si një përpjekje për të dekurajuar aplikimet e shumta dhe për të reduktuar mbingarkesën administrative, por edhe si një barrierë shtesë për të varfrit që shohin në këtë program një mundësi shpëtimi.
Ndërkohë, komunitetet emigrante dhe grupet që mbështesin emigrantët kanë filluar të ngrejnë shqetësime për implikimet sociale dhe ekonomike që një masë e tillë mund të sjellë, duke paralajmëruar se kjo mund të përjashtojë shumë individë me potencial real nga procesi vetëm për shkak të pamundësisë ekonomike.
Miratimi ose rrëzimi i këtij drafti do të jetë vendimtar për fatin e Lotarisë Amerikane siç e kemi njohur deri më tani. Opinioni ndërkombëtar dhe ai emigrant po e ndjek me shumë vëmendje këtë proces.