Një ngjarje dramatike ka tronditur sot Lubjanën, ku deputeti i Partisë Demokratike Sllovene (SDS), Andrej Hoivik, është ngjitur në kulmin e ndërtesës së Parlamentit, duke kërcënuar se do t’i jepte fund jetës.
Incidenti ndodhi në orët e paradites dhe vuri në alarm të gjitha shërbimet emergjente. Brenda pak minutash, në vendngjarje mbërritën forcat e policisë, zjarrfikësit dhe ambulanca. Pas negociatave të shpejta dhe ndërhyrjes vendimtare të zjarrfikësve, Hoivik pranoi të zbresë dhe iu dorëzua personelit mjekësor pa dëmtime fizike.
Në një deklaratë të shkurtër pas ngjarjes, deputeti Hoivik theksoi se nuk e fajëson askënd për gjendjen në të cilën ndodhet, as kryeministrin Robert Golob, por shtoi me ton të zymtë: “Ajo që po ndodh në këtë vend nuk është e drejtë.”
Policia ka cilësuar rastin si një situatë krize psikologjike dhe ka nisur procedurat për trajtimin e mëtejshëm të deputetit. Ndërsa motivet mbeten ende të paqarta, burime jozyrtare kanë konfirmuar se Hoivik kishte shfaqur prej javësh shenja të forta rraskapitjeje emocionale dhe mbingarkese psikologjike.
Partia Demokratike Sllovene ka reaguar me një mesazh solidariteti: “Sprovat që na sjell jeta janë ndonjëherë tepër të rënda. Kërkojmë mirëkuptim, empati dhe dhembshuri. Faleminderit!”
Ngjarja ka hapur debat publik mbi shëndetin mendor të përfaqësuesve politikë dhe presionin e jashtëzakonshëm që ata përballojnë, shpesh në heshtje. Partia Demokratike Sllovene (SDS), e udhëhequr nga Janez Janša, aktualisht ndodhet në opozitë në parlamentin e Sllovenisë.
Pas zgjedhjeve parlamentare të 24 prillit 2022, SDS fitoi 27 vende në Asamblenë Kombëtare, duke u renditur si partia e dytë më e madhe pas Lëvizjes për Liri (GS) të Robert Golob, e cila fitoi 41 vende.
Koalicioni qeverisës aktual përbëhet nga Lëvizja për Liri, Social Demokratët (SD) dhe partia e majtë Levica, duke siguruar një shumicë në parlament me 51 nga 90 vende.
— Uroš Petohleb🍀 (@UrosPetohleb) May 16, 2025