Një aksident me pasojë vdekjen ka ndodhur në orët e vona të mbrëmjes së djeshme, rreth orës 23:20, në autostradën Tiranë-Durrës. Ngjarja tragjike ka ndodhur në një segment të rrugës që aktualisht është në proces ndërtimi dhe raportohet të jetë i paaksesueshëm për qarkullimin e lirë.
Sipas informacioneve nga policia, shtetasi me iniciale F.Z., rreth 38 vjeç, duke drejtuar automjetin e tij, ka përplasur biçikletën me të cilën po lëvizte shtetasi E.M., rreth 66 vjeç. Për shkak të plagëve të marra në përplasje, 66-vjeçari ka humbur jetën në vend.
Drejtuesi i automjetit 38-vjeçar është shoqëruar menjëherë në komisariatin e policisë për të dhënë shpjegime dhe për të sqaruar rrethanat e plota të këtij aksidenti. Grupi hetimor i policisë ka nisur punën për të zbardhur të gjitha detajet lidhur me ngjarjen, ndërsa materialet procedurale i janë referuar Prokurorisë së Rrethit Gjyqësor Tiranë për veprime të mëtejshme ligjore.
Mbetet për t’u përcaktuar se si 66-vjeçari po lëvizte me biçikletë në një zonë të autostradës që raportohet të jetë e paaksesueshme dhe arsyet e pranisë së automjetit në atë segment rrugor.
“Më datë 09.07.2025, rreth orës 23:20, në autostradën Tiranë–Durrës (dyshohet në një segment të rrugës që është ende i paaksesueshëm), shtetasi F. Z., rreth 38 vjeç, duke drejtuar automjetin e tij, ka aksidentuar biçikletën me të cilën po lëvizte shtetasi E. M., rreth 66 vjeç.
Si pasojë e aksidentit, 66-vjeçari ka humbur jetën. Drejtuesi i automjetit është shoqëruar në Komisariat, për veprime të mëtejshme procedurale. Grupi hetimor po vijon punën për zbardhjen e plotë të rrethanave të aksidentit. Materialet procedurale iu referuan Prokurorisë së Tiranës për veprime të mëtejshme”, njoftoi policia.