Një atentat mafioz tronditi Medelinin e Kolumbisë ditën e djeshme, ku një shtetas shqiptar mbeti viktimë e një sulmi me pagesë. Viktima është identifikuar si Artur Tushi, 44 vjeç, me origjinë nga fshati Raboshtë i Lezhës, i njohur me pseudonimin ‘Qoti’. Ai u vra në një rrugë pranë qendrës tregtare Santa Fe, në lagjen El Poblado.
Dinamika e vrasjes dhe arrestimi i autorit venezuelian
Atentatori, i cili lëvizte me motoçikletë dhe është me kombësi venezueliane, dyshohet se u afrua drejt viktimës dhe i kërkoi vetëm emrin.
“Ai i kërkoi vetëm emrin e personit dhe, kur e konfirmoi se ishte ai e qëlloi për vdekje”, tha një dëshmitar.
Autoritetet kolumbiane kanë reaguar shpejt, duke arrestuar autorin e dyshuar. Gjenerali William Castaño, komandant i Policisë Metropolitane, njoftoi se i ndaluari iu dorëzua Zyrës së Prokurorit të Përgjithshëm dhe rrezikon dënime deri në 33 vjet burg. Policia po kërkon informacione përmes Interpolit për të zbardhur të kaluarën kriminale të viktimës dhe motivet e sakta të atentatit, pasi paraprakisht dyshohet për larje hesapesh mes grupeve të trafikut.
Gjatë atentatit, një grua 77-vjeçare mbeti e plagosur, por ende nuk është e qartë nëse ishte në shoqërinë e viktimës apo kalimtare e rastit. Tushi, megjithëse shqiptar, mbante dokumente ekuadoriane.
Rrjetet shqiptare, aktorë kyç në trafikun e kokainës në Amerikën Latine
Vrasja e Tushit nënvizon rolin gjithnjë e më të madh që kanë rrjetet kriminale shqiptare, shpesh të quajtura “mafia shqiptare” (edhe pse janë rrjete të decentralizuara), në trafikun ndërkombëtar të kokainës.
Sipas hetimeve të InSight Crime, këto grupe e kanë kthyer Ekuadorin (veçanërisht portin e Guayaquil) në bazën e tyre kryesore për operacionet transatlantike. Ata dërgojnë emisarë në Amerikën e Jugut për të negociuar direkt me prodhuesit kolumbianë (si disidentët e FARC-ut ose Urabeños), duke siguruar kokainën me çmime shumë të ulëta (2,000 deri në 4,000 USD për kilogram) dhe duke e rishitur në Evropë për çmime që shkojnë nga 30,000 deri në 40,000 USD për kilogram.
Kjo prani ka sjellë një konkurrencë të fortë mes rrjeteve ballkanike, e cila shpesh materializohet në vrasje të anëtarëve të dyshuar të mafias në qytetet portuale si Guayaquil. Rrjeti i shqiptarit Dritan Gjika (Tony), i cili trafikoi mbi 9.5 tonë kokainë, shërben si shembull kryesor i sofistikimit të këtyre grupeve, të cilat përdorin kompani fasadë dhe kontakte të nivelit të lartë brenda elitave të sigurisë për të vepruar.
