Arrestimi i reperit shqiptar Noizy në aeroportin e Zyrihut, pak para performancës së tij të planifikuar në klubin Rinora 4, vazhdon të jetë në qendër të vëmendjes. Sipas një raportimi ekskluziv nga Prive by Liberta Spahiu, burime të sigurta pranë reperit kanë konfirmuar se ai nuk ka qenë në dijeni që çështja e konfliktit të tij të mëparshëm me Medën ishte denoncuar edhe në Zvicër nga pala tjetër.
Prive ka kontaktuar ekskluzivisht avokatin e njohur zviceran, André Kuhn, për të kuptuar më mirë rreziqet ligjore me të cilat mund të përballet artisti shqiptar në Zvicër. Avokati Kuhn ka sqaruar se, bazuar në informacionet e deritanishme, viktima në konfliktin e Noizyt është sulmuar njëkohësisht nga disa të dyshuar. Ai ka theksuar se një sulm i tillë në Zvicër mund të dënohet me gjobë ose me burgim deri në pesë vjet.
Një pyetje e rëndësishme që lind në këtë situatë është nëse Zvicra mund ta ndjekë penalisht Noizyn për një vepër penale të kryer jashtë territorit të saj, konkretisht në Kosovë. Avokati Kuhn ka shpjeguar se është e mundur që autoritetet kosovare ta kenë shpallur Noizyn në kërkim. Në këtë rast, Kosova mbetet përgjegjëse për ndjekjen penale dhe mund t’i kërkojë Zvicrës ekstradimin e tij.
Megjithatë, nëse ekstradimi nuk realizohet, ligji zviceran parashikon që në raste të caktuara, një gjykatë zvicerane mund të dënojë një person për vepra të kryera jashtë vendit, siç përcaktohet në nenin 7 të Kodit Penal Zviceran. Kuhn ka shtuar se dënimi varet nga disa faktorë, përfshirë nëse i dyshuari ka kryer më parë vepra penale, pasi përsëritja e veprave penale dënohet më ashpër.
Kjo situatë ligjore në Zvicër mund të ketë pasoja serioze për karrierën ndërkombëtare të Noizyt. Koncertet në Zvicër, të cilat kanë qenë një pjesë e rëndësishme e turneve të tij deri më tani, mund të bëhen të paarritshme për një periudhë të gjatë kohore, ose ndoshta përgjithmonë.