Nxehtësia afrikane vazhdon të mbizotërojë në Shqipëri që nga fillimi i muajit Qershor, me temperatura ekstreme që kalojnë shkallën 40 gradë Celsius duke vijuar edhe gjatë muajit Korrik.
Sinoptikania Lajda Porja ka paralajmëruar se dita e sotme, e diel, do të jetë dita më e nxehtë për këtë verë deri më tani. Vlerat më të larta të temperaturës pritet të regjistrohen në qarkun e Beratit. Megjithatë, sipas parashikimeve, një rënie e lehtë e temperaturave me rreth 5 gradë Celsius pritet të ndodhë në mesjavën e ardhshme, duke sjellë njëfarë freskimi.
“Në fundjavë presim temperatura 39-40 në shumë qytete dhe 41 gradë vetëm në qarkun e Beratit. Kemi një freskim nga mesi i javës tjetër, nga e mërkura ku të paktën për 3 apo 4 ditë do të marrim frymë. Termometri ulet deri në 34 apo 35, por do jetë e shkurtër si kohë”, tha ajo.
“Është parashikuar që korriku të jetë mjaft i nxehtë. Nuk presim të thyhen rekordet, po do ketë shumë ditë, 7 apo 10 ditë me temperatura që luhaten nga 37-39”, ka deklaruar Porja, duke iu referuar temperaturave të larta që do të vazhdojnë edhe gjatë pjesës tjetër të muajit Korrik.