Kristjan Shkreli, kryetari i Bashkisë Vau i Dejës, është paraqitur sot në ambientet e Prokurorisë së Posaçme (SPAK) ku ka qëndruar për gati një orë. Ai është marrë në pyetje në cilësinë e personit nën hetim lidhur me dyshimet për blerje votash gjatë procesit zgjedhor të 11 majit.
Shkreli, i cili është pyetur nga prokurori i SPAK, Dritan Prençi, hetohet për akuzën e “korrupsionit aktiv në zgjedhje”. Dyshimet ndaj tij lidhen me pretendimet se ka blerë vota në favor të Partisë Socialdemokrate (PSD) të Tom Doshit.
Më parë, me urdhër të SPAK dhe vendim të Gjykatës së Posaçme (GJKKO), agjentët e Byrosë Kombëtare të Hetimit (BKH) i kishin sekuestruar kryebashkiakut Shkreli aparatin celular si pjesë e hetimeve.
Partia Socialdemokrate e Tom Doshit ka arritur të fitojë tre mandate në shkallë vendi në zgjedhjet e fundit, dy prej të cilave në qarkun e Shkodrës. Zona e Vaut të Dejës ka rezultuar si një bastion i votave për këtë parti, duke siguruar 5951 vota dhe duke dalë forcë e parë në këtë bashki. Hetimet e SPAK po synojnë të zbardhin nëse ky rezultat i lartë i votave në Vau i Dejës ka ardhur si pasojë e praktikave të paligjshme të blerjes së votës nga ana e kryebashkiakut Shkreli në favor të PSD-së.
