Ekipet e kërkimit shpëtimit kanë arritur të gjejnë 27-vjeçarin Ajet Lleshi dhe babain e tij, Riza LLeshi, të cilët kishin humbur në malin e Pashtrikut në Has.
Fatkeqësisht, i riu është gjetur i ngrirë dhe pa shenja jete, teksa burime bëjnë me dije se babai i tij është gjetur në gjendje të rënduar fizike dhe psikologjike, dhe ka marrë ndihmën e nevojshme nga autoritetet shëndetësore.
Ajet Lleshi nga fshati Kishaj i Hasit ishte nisur që prej mëngjesit të djeshëm drejt malit të Pashtrikut për për të prerë dru në pyll, por rreth orës 17:00 familjarët e tij denoncuan se kishin humbur kontaktet me të.
Në këto kushte, babai i të riut bashkë me tre xhaxhallarët e tij kanë dalë në mal për ta kërkuar, por janë ndarë në drejtime të ndryshme dhe që prej orës 2 të mëngjesit familja ka humbur kontaktet edhe me babain e 27-vjeçarit.
Ende nuk dihen më shumë detaje rreth kësaj ngjarje, teksa priten hetime për të përcaktuar shkakun e vdekjes së 27-vjeçarit.