Këngëtarja me origjinë shqiptare, Bebe Rexha, ka ndarë me ndjekësit një nga momentet më të dhimbshme të jetës së saj personale. Në një postim emocional në platformën X (ish-Twitter), artistja zbuloi se ka përjetuar një humbje shtatzënie – një rrëfim që erdhi pas një vale kritikash mizore për peshën e saj pas paraqitjes në Met Gala 2025.
“U bëra shtatzënë, por nuk funksionoi… dhe e kam mbajtur këtë dhimbje në heshtje,” – shkruante Rexha në postimin që më vonë u fshi. Ajo tregoi se përjeton Sindromën e Ovareve Polikistike (PCOS), një gjendje që ka ndikuar në shtimin e peshës dhe i ka vështirësuar përpjekjet për të mbetur shtatzënë.
Këngëtarja theksoi se ndonëse nuk i detyrohet askujt shpjegime për trupin e saj, vendosi të flasë hapur për të ngritur vetëdijen mbi pasojat që mund të kenë komentet e pamatura mbi pamjen fizike të dikujt. “Njerëzit duhet të mendojnë dy herë para se të flasin për trupin e një tjetri,” – nënvizoi ajo.
Rexha nuk zbuloi se kur ndodhi humbja e shtatzënisë apo identitetin e partnerit, duke e mbajtur private këtë pjesë të jetës së saj. Por vendimi për të ndarë këtë përvojë të dhimbshme u motivua nga presioni publik dhe komentet negative që mori për trupin e saj, të cilat u bënë nxitje për të rrëfyer të vërtetën e saj.
Artistja ka folur edhe më herët për PCOS-in, duke treguar se kjo gjendje hormonale i ka sjellë jo vetëm ndryshime fizike, por edhe sfida emocionale të thella.
Deklarata e saj ka ngjallur një reagim të fuqishëm solidariteti nga fansat dhe figura të njohura publike, të cilët e kanë përgëzuar për guximin dhe sinqeritetin në trajtimin e një teme kaq të ndjeshme si humbja e një shtatzënie.
