Një seri tërmetesh ka goditur Shqipërinë në orët e para të mëngjesit të së martës, më 24 qershor 2025, duke shkaktuar panik, pasiguri dhe frikë në shumë zona të vendit, veçanërisht në Tiranë dhe Durrës, ku lëkundjet u ndjenë më fort.
Sipas të dhënave të publikuara nga Qendra Sizmologjike Euro-Mesdhetare (EMSC), tërmeti më i fortë ishte ai i regjistruar në orën 05:04 me orën lokale, me magnitudë 4.2 Rihter dhe një thellësi prej 15 kilometrash, me epiqendër 15 km në veriperëndim të Tiranës.
Por ky nuk ishte i vetmi: Brenda një harku kohor prej më pak se 30 minutash, janë regjistruar edhe tre goditje të tjera:
05:18 – Magnitudë 2.2 Rihter, 10 km në veriperëndim të Tiranës
05:26 – Magnitudë 2.2 Rihter, 13 km në veriperëndim të Tiranës
05:28 – Magnitudë 3.1 Rihter, 9 km në lindje-verilindje të Himarës
Ndërsa goditja e parë ishte më e forta dhe ka zgjuar qytetarët në panik, paslëkundjet e njëpasnjëshme kanë shtuar frikën dhe pasigurinë.
“U zgjova nga lëkundja e fortë. Shtëpia u drodh, fëmijët u ngritën të frikësuar. Pastaj, pas 10 minutash u ndje prapë një tjetër,” shkruan një qytetare nga Tirana në faqen zyrtare të EMSC.
“Në Durrës ndjehej si të ishte një shpërthim, por e kuptuam që ishte tërmet. Doli e gjithë lagjja jashtë,” raportuan banorë nga qyteti bregdetar.
Komentet e shumta të qytetarëve online tregojnë për ndikim të gjerë dhe frikë të theksuar, sidomos nga fakti që lëkundjet ishin të njëpasnjëshme dhe në orar gjumi.
Deri në këtë moment, nuk raportohen dëme materiale apo të lënduar, por autoritetet janë në gadishmëri dhe po monitorojnë situatën. Instituti i Gjeoshkencave dhe Emergjencat Civile pritet të publikojnë një raport të përditësuar në orët në vijim.
Ekspertët bëjnë thirrje për qetësi, por gjithashtu këshillojnë qytetarët të respektojnë masat e sigurisë dhe të jenë të vëmendshëm në rast të paslëkundjeve të tjera.
Ky zinxhir goditjesh vjen si kujtesë e qartë e aktivitetit të lartë sizmik në rajon dhe e nevojës për përgatitje dhe ndërgjegjësim të vazhdueshëm.
