Ngjarjet e fundit në Bashkinë e Vlorës, me kërkesën për dorëheqje të menjëhershme të drejtuesve lokalë, nuk janë aspak të rastësishme sipas analistit Arion Sulo. Në një debat televiziv, Sulo e cilësoi gjithë situatën si një “lajm të prodhuar nga propaganda”, një manovër e qëllimshme për të zhvendosur vëmendjen nga skandalet e mëdha, veçanërisht katastrofa mjedisore në Elbasan dhe çështja e inceneratorëve.
“Vlora është një trillim propagandistik. Nuk ka problem real atje, përveç mungesës kronike të ujit dhe djegies së mbetjeve, të cilat janë probleme të vjetra. Mbetjet digjen për vite dhe uji mungon – ndërkohë që qeveria shfaqet sikur po ‘shkund’ Vlorën nga problemet,” – deklaroi Sulo.
“Edhe sot që flasim, pas çdo vendimi fshihet emri i Klodian Zotos dhe Mërtirit – jo i Ermal Dredhës. E vetmja gjë që ndryshon është skenografia.”
Sipas tij, përballë denoncimeve gjithnjë e më të forta për korrupsion në inceneratorët, Rama po ndërton një “mizanskenë” në Vlorë për të prodhuar një imazh vendosmërie, duke larguar vëmendjen nga problemet reale.
“Nuk ka asnjë lidhje dorëheqja me përmirësim të qeverisjes lokale. Është thjesht për të shmangur përgjegjësinë për krimet mjedisore dhe aferën e inceneratorëve. Tani duhen ‘koka turku’, sepse shifrat e turizmit janë në rënie, ndërtimi është ftohur dhe bujqësia po shkon drejt kolapsit.”
Edvin Kulluri e çon më tej kritikën duke paralajmëruar një kolaps të përgjithshëm, për shkak të ndërprerjes së financimeve të paligjshme nga trafiku i drogës.
“Do ketë kolaps financiar dhe institucional. Bashkitë po drejtohen nga burgu – jo në mënyrë metaforike, por realisht nga krerë të grupeve kriminale. Sistemi ka rënë. Deputetët janë të padukshëm, drejtësia nuk ekziston, qeverisja është vetëm në letër,” – tha Kulluri me tone alarmuese.
“Qëkur e ke bërë Vlorën bashki me Novoselën, Dukatin, Babicën, nuk është më njësi vendore – është kthyer në komitet ekzekutiv. Edhe gjeni të vësh kryetar bashkie, nuk e shpëton dot. Sepse problemi është vetë sistemi.”
Ai shtoi se mungesa e ndarjes së pushteteve dhe e sigurisë juridike ka krijuar një “rrumpallë të centralizuar”, ku çdo vendim varet nga një njeri i vetëm: “despoti”, siç e cilësoi ai Ramën, që mban pushtetin prej 12 vitesh ndërkohë që Vlora ende nuk ka ujë të pijshëm dhe infrastruktura mbetet e dështuar.
Nora Malaj: Alarmet nisën që në festën e PS-së
Edhe ish-zëvendësministrja e Arsimit, Nora Malaj, e konsideroi situatën në Vlorë si një skenar të paralajmëruar që nga festa e Partisë Socialiste, menjëherë pas kthimit të Ramës nga Shtetet e Bashkuara.
“Në atë event pati tension mes kryeministrit dhe kryetarit të bashkisë së Vlorës. Ishte sinjali i parë që diçka nuk shkonte. Më pas, kur u vendos dorëheqja kolektive, askush nuk e pyeti pse – të gjithë zbatuan urdhrin në mënyrë të verbër.”
Për Malajn, kjo situatë është shenjë e një sistemi pushteti që nuk menaxhohet më me mekanizma demokratikë, por me urdhra vertikalë që shkatërrojnë çdo fijë autonomie vendore.
“Kur një fije pushteti kontrollohet absolutisht, me kohë bien të gjitha fijet. Po jetojmë një moment ku pushtetet janë përqendruar rrezikshëm dhe nuk ka më as kontroll, as llogaridhënie.”
KONKLUZIONI?
Sipas zërave kritikë, “teatri i Vlorës” nuk është reformë, por një shfaqje. Dhe si çdo shfaqje politike, ajo mbulon të vërtetat më të pakëndshme: korrupsionin, dështimin ekonomik dhe shkatërrimin e institucioneve. Vlora sot është thjesht preteksti më i fundit.