Një tërmet i fortë me magnitudë 5.9 ballë të shkallës Rihter u regjistrua në orën 02:17 pas mesnatës me orën lokale, në zonën detare midis Rodosit dhe Turqisë.
Sipas mediave fqinje lëkundjet ishin shumë të forta. Banorët dhe turistët e ishullit të tmerruar dolën me shpejtësi nga hotelet dhe banesat ku po qëndronin.
Kryetari i komunitetit shqiptar në Rodos, Ari Kasapi tha për “People” në Euronews Albania, se tërmeti u shoqërua me panik dhe me frikë për cunami, pasi qendra e tij ishte shumë afër me Rodosin.
“E ndiem shumë sepse ishim të gjithë në gjumë. Qendra e tërmetit ishte vetëm 7 kilometra nga Rodosi dhe ishte 6.7 ballë në atë moment që na e treguan telefonat. 5.9 e nxori qendra në Athinë. Këtë kohë ka pasur tërmete të vogla, por tani ka pasur zjarr, përmbytje dhe tërmete.
Unë kam një biznes me aksesorë turistik, nuk pati dëme, por pati diku te 10 shtëpi të vjetra që u dëmtuan. Më tepër ishte paniku i krijuar në hotelet e mëdha, pati frike edhe për cunami” -tha ai.
Greqia nuk raportoi lëndime në njerëz, në Turqi një vajzë 14-vjeçare ndërroi jetë si pasojë e një sulmi paniku gjatë tërmetit, ndërsa 69 persona mbetën të plagosur, pasi u hodhën nga lartësia për shkak të frikës.