Fation Janina, autori i dyshuar i vrasjes së fqinjit të tij 82-vjeçar, Paulin Gina në lagjen Nr. 16 të qytetit të Durrësit, me një qetësi të frikshme shihet teksa del nga pallati pak pasi ka kryer aktin makabër.
Policia e Durrësit ka siguruar edhe video nga kamerat e sigurisë në rrugë, të cilat e kanë fiksuar 39-vjeçarin duke dalë nga pallati, pasi kishte kryer vrasjen.
Sipas policisë, Fation Janina, pasi ka kryer krimin, e ka mbyllur viktimën në banesë.
Gjatë kontrollit në banesën e autorit të dyshuar, Policia e Durrësit gjeti dhe sekuestroi 2 thika, 1 çekiç dhe veshjet, që dyshohet se ka patur autori gjatë kryerjes së krimit.
Mjeti prerës, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme.
Pas arrestimit të tij, vetë 39-vjeçari ka rrëfyer krimin e rëndë, duke thënë se shkak ishte bërë një borxh në vlerën e 20 mijë lekëve që viktima i kishte atij.
Autori Fation Janina prej kohësh jetonte i vetëm dhe në zonë njihej si person që konsumonte alkool. I vetëm jetonte dhe viktima, Paulin Gila, baba i 3 djemve, të cilët prej kohësh ndodhen në emigrim në Itali.