Blendiana Mura, një vajzë nga Vlora, është kthyer në një fenomen të vërtetë në rrjetin social TikTok, falë videove të saj të këndshme dhe plot dashuri me partnerin e saj nga Gana, Michael Akromah. Çifti simpatik ka fituar zemrat e mijëra ndjekësve, duke ndarë momente nga jeta e tyre personale dhe duke sfiduar çdo paragjykim kulturor apo distancë fizike.
Në një intervistë televizive, Blendiana dhe Michael ndanë për herë të parë në mënyrë të detajuar historinë e njohjes së tyre të pazakontë. Sipas rrëfimit të Blendianës, gjithçka nisi në qytetin romantik të Venecias, ku Michael në atë kohë ishte në shoqërinë e një mikeshe të saj.
“Ne u takuam për herë të parë në Venecia. Në fakt, Michael po dilte me një shoqen time. Kur e pashë për herë të parë, i thashë një kompliment, por ai nuk më kushtoi shumë vëmendje. Ne vazhduam të takohemi vetëm si shokë për një kohë të gjatë,” tregoi Blendiana me buzëqeshje.
Pas një viti pa kontakt, kur mendoi se lidhja e tyre ishte thjesht një njohje e zakonshme, Blendiana u përpoq ta gjente sërish Michael në Instagram, por pa sukses. Megjithatë, fati i buzëqeshi në TikTok, ku rastësisht e gjeti profilin e tij.
“E pashë që kishte disa video ku ishte DJ dhe kërcente, dhe i shkruajta për të pyetur ku i kishte videot e kërcimit. Edhe këtë herë nuk ma vari shumë,” kujtoi Blendiana me humor.
Pavarësisht fillimeve të ftohta, ndjenjat mes tyre u zhvilluan natyrshëm me kalimin e kohës dhe sot ata janë një çift i konsoliduar, që përballon çdo sfidë së bashku, përfshirë edhe distancën e madhe që i ndan.
“Jetojmë në qytete të ndryshme për shkak të punës së Michael. Ai udhëton plot 7 orë vetëm që të më takojë për një ditë dhe të kthehet përsëri. Është shumë e vështirë, por ne nuk mund të rrimë pa njëri-tjetrin,” tha Blendiana, duke shprehur emocionet që lidhja e tyre i sjell çdo ditë.
Çifti gjithashtu kanë krijuar familjen e tyre të vogël dhe janë prindër të një vajze të vogël të quajtur Kylie, e cila sipas tyre është bekimi më i madh i jetës.
“Michael ka një shpirt shumë të madh. Ai di si të japë dashuri dhe ngrohtësi. Ndihem e bekuar që kam dikë si ai në jetën time,” përfundoi Blendiana, duke përlotur edhe audiencën me fjalët e saj plot dashuri.