Një ngjarje e rëndë ka tronditur qytetin e Milanos në natën e Ferragostos, ku një grua 64-vjeçare, Nunzia Antonia Mancini, dyshohet se ka vrarë partnerin e saj, Vincenzo Ferrigno, 73 vjeç. Sipas raportimeve të mediave italiane, krimi ka ndodhur rreth orës 3:00 të mëngjesit. Gruaja dyshohet se ka goditur me thikë disa herë burrin e saj, ndërsa ai po flinte në shtrat, dhe më pas e ka mbytur me një jastëk.
Menjëherë pas kryerjes së krimit, Mancini doli në rrugë dhe telefonoi Policinë, duke thënë: “Ejani se e vrava, nuk munda ta duroja më.”
Policia dhe ekipet e emergjencës mbërritën shpejt në banesën e çiftit në katin e dytë të një pallati në Milano, ku gjetën trupin e pajetë të 73-vjeçarit në shtrat, të rrethuar nga një pellg gjaku. Gruaja u arrestua menjëherë dhe po mbahet në paraburgim, ndërsa hetimet vijojnë për të përcaktuar me saktësi të gjitha rrethanat e krimit.
Siç mësohet, çifti kishte qenë bashkë për më shumë se 40 vjet, megjithëse nuk ishin martuar kurrë. Viktima, një ish-shitës gazetash, kishte pësuar disa goditje në tru gjatë viteve të fundit. Gjendja e tij shëndetësore ishte përkeqësuar ndjeshëm, duke e lënë të palëvizshëm muajt e fundit. Kujdesi për të ishte bërë i lodhshëm për 64-vjeçaren, duke i shkaktuar asaj vuajtje dhe acarim të madh.
Policia dhe prokuroria po punojnë për të mbledhur prova dhe për të verifikuar dëshminë e gruas, e cila shprehu hapur vështirësitë e saj. Kjo ngjarje tragjike hedh dritë mbi sfidat e kujdesit për personat në nevojë dhe barrën e rëndë që mund të mbajnë kujdestarët.