Një krim i rëndë ka tronditur Melburnin, ku një 34-vjeçar i pastrehë, Ross Judd, është arrestuar dhe akuzuar për vrasjen makabre të një çifti brenda shtëpisë së tyre. Viktima ishin 39-vjeçarja Athina Georgopoulos, e cila ishte në muajin e pestë të shtatzënisë, dhe partneri i saj, Andrew Gane, 50 vjeç.
Sulmi ndodhi të hënën në mbrëmje, ndërsa policia mbërriti në vendngjarje, ku gjeti trupat e pajetë të çiftit. Sipas raportimeve, Gane dyshohet se i është prerë koka. Policia e arrestoi Ross Judd pak orë pas ngjarjes, në një stacion treni, dhe ai u paraqit para gjykatës të mërkurën, i akuzuar për dy vrasje.
Sulm i qëllimshëm, shkaku ende mister
Policia thotë se sulmi nuk ishte i rastësishëm dhe se i dyshuari duket se e njihte Andrew Gane. Megjithatë, lidhja e tij e saktë me viktimat ende po hetohet. Hetuesit po shqyrtojnë edhe një grafit të shkruar në pjesën e jashtme të shtëpisë së çiftit, me fjalët “tradhti” dhe “mjaft më”, që mund të ofrojë indicie mbi motivin e krimit.
Gjatë seancës gjyqësore, prokurorët kërkuan dhe morën një afat prej dhjetë javësh për të përgatitur dosjen me provat, për shkak të kompleksitetit të çështjes dhe vonesave të pritshme në kryerjen e autopsisë. Ky detaj është i rëndësishëm, pasi viktima Athina Georgopoulos ishte shtatzënë.
