Në një lëvizje të pazakontë por strategjikisht të rëndësishme, Greqia ka vendosur të transferojë disa nga sistemet e saj të avancuara raketore Patriot në bazën ushtarake të Marinës Helene dhe NATO-s në Gjirin e Sudës, në ishullin e Kretës. Vendimi është marrë për të forcuar mbrojtjen e objektivave amerikane në rajon, sipas burimeve të gazetës së njohur greke Kathimerini.
Sistemet Patriot, të prodhimit amerikan, janë ndër më të avancuarat në kategorinë e mbrojtjes ajrore. Ato janë të afta të neutralizojnë si kërcënimet ajrore nga avionët luftarakë, ashtu edhe raketat balistike, duke përbërë kështu një linjë të parë mbrojtjeje në çdo konflikt të mundshëm.
Sipas raportimeve, vendimi grek është marrë në koordinim të ngushtë me komandën amerikane në rajon, si pjesë e një ristrukturimi të shpejtë të prapavijës mbrojtëse, përballë përshkallëzimit të konfliktit në Lindjen e Mesme. Gjatë ditëve të fundit, tensionet mes Iranit dhe Izraelit janë përshkallëzuar ndjeshëm, duke ngjallur shqetësime serioze për një përplasje më të gjerë rajonale që mund të përfshijë edhe interesat amerikane në zonë.
Burime të afërta me strukturat e sigurisë greke kanë theksuar për Kathimerini se aktiviteti ushtarak amerikan në rajon është rritur ndjeshëm, përfshirë edhe operacionet logjistike dhe të vëzhgimit në Mesdheun Lindor. Transferimi i sistemit Patriot në Kretë synon të mbulojë zonat strategjike detare dhe ajrore, përfshirë bazat ushtarake amerikane dhe rrjetin e radareve të NATO-s.
Ndërkohë, Presidenti amerikan Donald Trump, i cili ende nuk ka marrë një vendim përfundimtar nëse do të përfshihet drejtpërdrejt në një konflikt me Iranin, thuhet se ka autorizuar paraprakisht një seri planesh ushtarake që përfshijnë goditje të synuara ndaj infrastrukturës iraniane në rast se situata del jashtë kontrollit.
Zyrtarë të Pentagonit kanë konfirmuar se në rast të përshkallëzimit, do të përdoren bazat ajrore në Kretë dhe në Itali për operacione të mundshme, ndërsa Greqia është vënë në pozicionin kyç të ndërmjetësit rajonal dhe aleatit strategjik për garancinë e stabilitetit në Mesdhe.
Lëvizja greke pritet të shihet me shqetësim në Ankara dhe Teheran, ndërkohë që në nivelet diplomatike në Bruksel, NATO po diskuton modalitetet e përfshirjes së aleatëve në rast të një ndërhyrjeje të Shteteve të Bashkuara në Lindjen e Mesme. Për momentin, megjithatë, zyrtarët evropianë po bëjnë thirrje për përmbajtje dhe zgjidhje diplomatike, edhe pse përgatitjet ushtarake në terren tregojnë të kundërtën.